DILI, 10 jullu 2019 (TATOLI)—Adjuntu Diretór Eskola Pre-Sekundária Sérgio Vierra de Mello, Afonso Soares, hateten prosesu aprendizajen iha eskola Sérgio Vieira de Mello la’o ho di’ak, maibé iha difikuldade mak areadór ne’ebé luan liu.
“Prosesu aprendizajen la’o di’ak no fahe ba parte rua. Dadeer no lorokraik. Iha dadeer atende alunu oitavo no nono ano. Lorokraik atende alunu sétimo ano,” hateten Adjuntu Diretór ba Agência Tatoli iha nia kna’ar fatin, Becora, kuarta (10/07/2019).
Nia informa, areadór ne’ebé luan halo estudante hosi eskola seluk tama-sai ho livremente ne’ebé fó implikasaun ba prosesu aprendizajen iha eskola refere.
“Difikuldade ne’ebé durante ne’e ami hasoru mak kuandu prosesu aprendizajen hahú, alunu hosi Eskola Sekundário 5 de Maio sempre mai tama iha ami-nia área eskola hodi disturba prosesu aula, depois akontese problema—to’o baku malu no tuda malu entre alunu eskola rua,” Afonso haktuir.
Aleinde ne’e, nia hatutan, tanba areadór luan, entaun komunidade nia balada sira tama hotu mai iha eskola hodi halo fo’er eskola ne’e.
Problema seluk, Afonso haklaken, sala aula agora dadaun ho kondisaun ladi’ak ona, plafon monu hotu ona, iha uma kakuluk kuak halo udan-been tama ba iha sala laran. Problema mós ba portaun. Ezemplu, bainhira halo reabilitasaun ba portaun sira, halo ohin la to’o semana ida bele aat fali tanba luan hela, entaun ema li’ur mós tama mai orsida selok, baku, tebe no tuda.
Nia afirma katak sira agora halo hela konstrusaun ba moru eskola nian, iha ne’ebé orsamentu ne’e mai hosi kontribuisaun inan-aman sira ho kada alunu $10, komesa iha tinan 2017-2019. Iha tinan kotuk, responsável hosi eskola refere hato’o ona proposta ba Ministériu Edukasaun atu tau-matan ba difikuldade hirak ne’e maibé seidauk hetan resposta pozitivu.
Jornalista: Nelia Fernandes
Editór: Xisto Freitas
