DILI, 11 jullu 2019 (TATOLI)-Ezisténsia TANE-Asosiasaun Defeza Konsumidór Timor-Leste, mak atu halo advokasia ba konsumidór sira hotu iha Timor-Leste (TL).
Prezidente Asosiasaun TANE Konsumidór, António Ramos da Silva (Naikoli) hateten, nu’udar asosiasaun ba defeza konsumidór nian, Tane iha nia kna’ar tolu, primeriu oinsá atu informa ba konsumidór sira, segunda eduka no forma konsumidór sira no terseiru reprezenta konsumidór.
“Tanba ne’e, bainhira konsumidór hasoru problema ho komersiante ba iha produtu alimentár, produtu bens utilizadu no seluk tan sira sosa, bele hato’o keixa imediata ba iha asosiasaun ,” informa Prezidente Naikoli ba jornalista iha kna’ar fatin Vila verde, Dili (11/07/19).
Nia hateten, hafoin simu keixa husi konsumidór reklama ninia problema, asosiasaun sei hato´o karta ba operadór ekonómiku, se sósiu empreza ne´e la responde, faze tuir mai sei denúnsia ba autoridade relevante sira hodi toma medida.
“Tanba dalabarak konsumidór sira laduun informadu kona-ba sira-nia direitu no dever ne’ebé deskreve ona iha lei númeru 8/2016, 8 jullu fó protesaun ba konsumidór nia no direitu no dever,” akresenta lider másimu Asosiasaun Tane Konsumidór, António Ramos.
Tuir nia, problema ne´ebé dalabarak konsumidór hasoru mak bainhira sira sosa tiha sasán ruma iha loja ka supermerkadu kuandu lori ba uma uza ladi’ak lori fali ba loja na´in la simu ona. Ida ne’e konsumidór no komersiante seidauk hatene loloos kona-ba lei defeza tanba ne’e mak Asosiasaun Tane Konsumidór ninia papel ida atu informa kona-ba lei.
“Tanba ida ne’e mak dala ida tan, relasiona ho problema konsumidór hasoru, problema ruma bele hakat mai iha edifísiu Asosiasaun Tane Konsumidór iha Vila Verde bele hato’o keisa,” husu Prezidente Asosiasaun Tane Konsumidór , António Ramos da Silva.
Direitu konsumidór sira nian konsagra iha Konstituisaun Repúblika Demokrátika Timor –Leste(RDTL), títulu III (Direitu no dever ekonómiku, sosiál no kultura ninian), artigu 53º (Direitu Konsumidór Sira nian).
- Konsumidór sira iha direitu atu simu sasán no servisu ne’ebé maka iha kualidade, no mós atu hatene informasaun loos, kona-ba sasán sira-ne’e atu proteje sira-nia saúde, seguransa no mós interese ekonómiku hanesan mós atu bele hadi’a buat ne’ebé aat.
- Lei maka regula publisidade, bandu publisidade hirak ne’ebé buka taka, hasees no, habosok.
Jornalista : Nelson de Sousa
Editór : Rafy Belo
