DILI,15 jullu 2019 (TATOLI)- Ministru Ensinu Superiór Siénsia Kultura (MESSK), Longuinhos dos Santos hateten, validasaun ba estatutu reitór Universidade Oriental Timor Lorosa´e (UNITAL), la´ós ninia kompeténsia maibé kompeténsia fundasaun nian-FUNATIL (Fundasaun Aswa´in Timor-Leste). Ne’e duni, MESSK lakohi submete iha prosesu universiade nian.
“Ha’u hateten ida ne’e tanba UNITAL adopta sistema autónomu, entaun kestaun reitores nian kompeténsia universidade liliu fundasaun mak sei haree,” hateten Ministru Longuinhos dos Santos iha Salaun Igreja Motael, segunda (15/07/2019).
Ministru Longinhos hatutan, estatutu UNITAL nian ne’ebé konsagra iha artigu 13º fó kompeténsia tomak ba prezidente fundasaun mak iha kna´ar tomak atu nomea reitór ida atu lidera instituisaun autónomu ne’e maibé tenke liuhusi proposta ne’ebé senadu sira aprezenta.
“Tanba ne’e, ami hanesan membru governu ne’ebé tutela ba asuntu edukasaun nian laiha kompeténsia ida atu interven iha prosesu ka lala´ok kona-ba nomeasaun reitores iha UNITAL maibé ami bele halo de’it fiskalizasaun,” tenik governante ne´e.
“Maibé kestaun kona-ba direitu estudante sira nian atu hetan gradusaun iha Universidade Autonomu ne’e mak kompeténsia MESSK nian,” nia reforsa.
Membru Governu ne’e haktuir, bainhira nia halo aproximasaun ho parte universidade kona-ba lista estudante UNITAL sira ne’ebé mak gradua ona. Universidade rasik garante katak laiha problema.
“Lista estudante UNITAL sira ne’e, depois ha’u aproxima, autoridade UNITAL rasik sira entrega ona ba ministériu nia liman. Ami hetan ona no agora halo tiha ona publikasaun iha Jornal da Repúblika portantu ami konsidera katak asuntu ho estudante UNITAL nian laiha problemas,” dehan governante ne´´e.
“Portantu objetivu prinispál MESSK nian hakarak liliu estatutu estudante sira ne’ebé gradua tiha ona iha 2018 tenke loloos atu nune’e labele prejudika fali sira ninia prosesu ba futuru,” klarifika governante ne´e.
Notísia relevante: http://www.tatoli.tl/2018/12/unital-sei-gradua-estudante-915/
http://www.tatoli.tl/2018/12/unital-nomea-reitor-florindo-pereira/
Jornalista : Tomé Amado
Editór : Rafy Belo
