DILI, 16 jullu 2019 (TATOLI) –Ministériu Públiku (MP) liuhusi Prokuradór António Tavares da Silva, sujere ba Defeza ho Tribunál atu bele halo inspesaun lokál ba fatin inísiu ne’ebé oho vítima Vera Carvalho Martins to’o ba hakoi subar iha area Subaun, Manatuto.
“Ministériu Públiku hakarak husu ba Tribunál, inklui mós defeza, se bele halo inspesaun lokál iha Kristu Liurai (Kristo Rei) no Subaun, iha loron 19 jullu 2009, tuku 09:00 Otl, hodi hakle’an liu tan investigasaun ba kazu oho vítima Vera,” afirma Prokuradór António Tavares, iha sala audiénsia julgamentu iha Tribunál Distritál Dili (TDD), tersa (16/07/2019).
Ministériu Públiku (MP) liuhusi kontinuasaun julgamentu, husu ba tribunal katak, presiza halo inspesaun fatin ba kazu oho Vera iha Kristu Liurai to’o ba fatin hakoi subar vítima iha area Subaun, atu bele haforte deklarasaun sasin sira nian, tanba maioria deklarasaun parsiál.
Tribunal ho defeza mós konkorda ho Ministériu Públiku nia rekomendasaun hodi halo inspesaun lokál iha loron 19 jullu 2019 no iha loron tuir mai, 22 jullu 2019, rona hikas deklarasaun sasin ho inisiál AS tanba antes matebian mate sasin refere ko’alia ho matebian Vera.
Akuzasaun ne’ebé Ministériu Públiku imputa ba arguido na’in haat (4), katak, iha tinan 2015 too 2016 arguido NX ho vítima hela iha señora ida ho naran Rosa nia uma iha area Lekintai-Taibesi. Arguido NX iha relasaun (namora) ho vítima Vera Carvalho Martins.
Tuir kronolojia ne’ebé prodús husi atus notísia MP nian katak, iha loron 30 juñu 2018, tuku 16:00 Otl, arguido NX ba hasoru nia doben Vera iha Kampu Alor atu lori vítima ba Lekintai no toba iha ne’ebá.
Mai fali iha loron 01 fulan jullu 2018, dadersán, arguido NX ho vítima, sai husi uma Lekintai hodi ba fali vítima nia uma iha kampu Alor, ho objetivu atu hasoru malu ho vítima nia maun ho naran Marcel.
Depois hasoru malu, vítima nia maun Marcel aseita no autoriza vítima ho arguido atu ba foho, Lekidoe, para aprezenta arguido nu’udar doben ba vítima nia inan aman.
Maibé bainhira sira too iha area Palasiu Governu nia oin, arguido ho vítima diskute malu kona-ba asuntu la klaru, entaun arguido ho vítima la konsege ba Lekidoe, maibé liu fali ba area Kristo Rei. Ikus mai, arguido NX lori vítima toba kalan ida, no halo tan relasaun fen-la’en ho vítima.
Tuir faktu ne’ebé prodús husi MP, katak, iha loron rua antes, arguido konsege kaer toman vítima ho mane seluk iha vítima sira nia uma Kampung Alor.
Iha loron 2 fulan jullu 2018, arguido NX telefone nia maun, arguido NXB hodi lori karreta no katana atu ba iha area Kristo Rei, atu oho vítima, tanba antes arguido sira iha ona planu.
Tuir akuzasaun MP nian katak, ema ne’ebé mak halo planu atu oho vítima mak hanesan, arguido NX, NXB, ADJ no JT no planu nee sira halo iha area Likintai nian.
Depois de arguido NX kontaktu telemovel ba arguido NXB, arguido na’in tolu mós lori karreta ba hasoru vítima sira iha Kristo Rei.
Too iha ne’ebá, arguido ADJ no JT mak kaer vítima nia liman, no arguido NX mak ho katana taa vítima nia ulun dala rua, hasan dala ida, liman dala ida no lori katana nia tutun, sona iha vítima nia kotuk laran dala tolu.
Bainhira vítima hakilar, arguido ne’ebé nu’udar vítima nia namoradu ne’e hasai nia faru depois sulan ba vítima nia ibun atu labele hakilar lian sai.
Konsekuénsia direita no nesesáriu nee husi arguido nia hahalok tomak halo vítima mate iha fatin kedas.
Depois arguido sira oho hotu vítima, sira tula kedas vítima nia mate isin iha karreta laran, too iha eis loza Hello Master nia oin sosa Xinelus kór Pink atu fó vítima hatais.
Momentu lori too iha Subaun, arguido sira tun kee rai kuak ho katana, depois vítima nia doben arguido NX hasai vítima nia jaket fó hatais fali arguido nia jaket seluk ida mak lori hakoi vítima Vera.
Depois nee, hotu arguido sira fila ba uma iha Likintai, arguido sira halo juramentu fase estátua krús Jesus nian iha ortoriu, hoban ba bee katak labele kolia sai lia oho nee ba ema ida.
Hafoin liu tiha loron ida, arguido NX rasik lori vítima nia xinelus ba iha kampu Alor hodi hatete katak vítima halai lakon.
Arguido sira ezekuta sira nia planu hodi halakon vítima nia vida ho livre de liberada no konsentimentu duni.
Tanba nee Ministériu Públiku, akuza arguido sira ho krime omisídiu agravadu tuir artigu 139 husi kódigu penál, krime destruisaun, okulta saun ka profanasaun ba ka devér tuir artigu 224 kódigu penál, no krime arma Branka tuir artigu 2 alínea B lei númeru 5/2017.
Depois Tribunál le sai faktu iha akuzasaun laran, Tribunál husu ba arguido sira atu konfesa faktu.
Iha biban ne’ebá Tribunál rona uluk arguido, NX ne’ebé konsidera hanesan autór prinsipál.
Arguido NX, konfesa katak faktu sira ne’ebé konsta iha autos balu sala no balu laloos.
Nia dehan, faktu loos mak hanesan loos duni arguido ho vítima iha relasaun namora, tanba sira tuir malu kleur arguido mós hakarak ba aprezenta an ba vítima nia inan aman iha Lekidoe.
Maibé too iha dalan, depois sira na’in rua hetan aseitasaun husi vítima nia maun Marcel, vítima mak lakohi, no hakarak lori arguido ba fali Kristo Rei.
Tanba nee, arguido mós halo tuir vítima nia hakarak, lao ba Kristo Rei nia kotuk, Dolok Oan durante kalan tomak .
Arguido mós rekoñese katak, durante sira nia toba kalan tomak nee, sira iha duni relasaun nu’udar fen-la’en.
“Ami nia relasaun namora kleur ona, entaun ha’u mós hakarak ba aprezenta an ba vítima nia família ou inan aman iha Lekidoe, maibé vitima mak lakohi no nia hakarak ami rua ba de’it iha Kristo Rei, hodi toba duni kalan ida iha ne’ebá,” arguido NX deklara arguido ba Tribunál.
Arguido hatutan, too iha deder san, vítima fanun arguido dehan hamlaha, entaun momentu nee tanba sira nia osan laiha, arguido husik hela vítima iha Kristo Rei, lao mai fali Likintai atu bolu arguido nia maun sira tula sira na’in rua.
Maibé depois arguido ho nia maun sira ba bolu vítima, vítima laiha ne’ebá, entaun sira komesa buka loron tomak mós la hetan.
Hosi arguido nia deklarasaun nee, MP konsidera katak arguido nega tomak faktu, katak sira la oho vítima, maibé konsidera vítima lakon.
Audiénsia nee preside hosi Juis, Eugevio Xavier, Ana Paula, Zulmira Auxliadora, parte Ministériu Públiku reprezenta prokuradór Antonio Tavares da Silva, no arguido sira hetan asisténsia legal hosi advogadu privadu nain lima husi konsultóriu advokasia Lafaek, hanesan Advogadu Agostinho de Jesus, Miguel Faria, Ismael, Virna Lourença no Adelina Loubo.
Jornalista : Domingos Piedade Freitas
Editór : Francisco Simões
