Governu Husu Uniaun Europeia Apoia Dezenvolve Setór Justisa

DILI, 23 jullu 2019 (TATOLI)-Governu Timor-Leste liuhusi Ministru Justisa, Manuel Cárceres da Costa, husu ba Embaixadór Uniaun Europeia (UE), Alexandre Leitão, atu Uniaun Europeia kontinua fó apoiu ba Timor-Leste liuliu formasaun rekursu umanu hodi dezenvolve setór justisa.
Embaixadór Alexandre Leitão, ohin, hasoru malu ho Ministru Justisa, Manuel Cárceres da Costa, iha Ministériu Justisa, hodi informa kona-ba nia mandatu ne’ebé termina ona, inklui halo despedida ho Ministru Manuel Cárceres da Costa.
Kona-ba pedidu Ministru Justisa nian ne’e, Embaixadór Alexandre Leitão, kompromete sei iha embaixada hodi sai hanesan rekomendasaun ba Embaixadór foun para kooperasaun Uniaun Europeia nian ho Timor-Leste bele alarga tan justisa.
Daudaun ne’e Uniaun Europeia fó hela asisténsia iha setór edukasaun entaun no importante mós ba setór justisa tanba Ministru Justisa konsidera katak, justisa mós parte ida husi edukasaun.
Ministru Manuel Cárceres dehan, durante diskusaun ho Embaixadór Alexandre Leitão, aprezenta mós planu formasaun ba Juiz, Prokuradór, Defensór Públiku, Advogadu privadu iha futuru. Ne’ebé iha tinan 2020 sei haruka Timoroan hamutuk ema na’in 20 hodi hasai kursu iha área juis no prokuradór iha Portugál.
Ministériu Justisa liuhusi Polisia Sientífika Investigasaun Kriminál (PCIC-sigla portugés) hetan apoiu ekipamentu laboratóriu husi Uniaun Europeia, tanba ne’e, ofisiálmente lori governasaun da-ualu hodi agredese Uniaun Europeia.
Embaixadór Alexandre Leitão, sei husik Timor-Leste no fila ba nia rai iha loron 31 fulan Agostu 2019 tanba hala’o ona misaun diplomátiku durante tinan tolu hahú iha 2016-2019.
Alende Portugal, MJ mós antes ne’e halo ona enkontru ho Sekretáriu Konsellu Nasionál Justisa Brazíl, Carlos Vieira Von Adamek no Ajénsia Kooperasaun Brazileira ka Agensia Brasileira de Cooperacão (ABC-sigla Portugés) hodi ko’alia oinsá haruka timoroan ba hasai Defensoria Públika iha Brazíl.
Jornalista : Agapito dos Santos
Editór : Francisco Simões

