DILI, 23 jullu 2019 (TATOLI)-Forum Instituisaun Nasionál ba Diretu Umanu iha Sudeste Aziátiku (SEANF-sigla Inglés), ohin, iha Dili, realiza semináriu internasionál iha Dili hodi diskute kona-ba planu estratéjiku no mekanizmu hodi rezolve problema mudansa klimátika ne’ebé fó impaktu ba diretu ema nian, liuliu asesu ba bee moos, agrikultura no saúde.
Provedoria Diretu Umanu no Justisa (PDHJ-sigla Portugés) maka sai uma na’in hodi organiza semináriu internasionál ne’e, ho tema ‘Together we are creating a society where human rights are respected, protected and fulfilled’.
Semináriu internasionál ne’ebé sei hala’o durante loron tolu ne’e, partisipa mós reprezentante husi Indonézia, Tailándia, Malázia, Filipina no Myanmar.
“Diskusaun oinsá nasaun membru sira atu haree mekanizmu no estratéjia ida para bele define hodi servisu hamutuk liu-liu hodi haree ba asuntu mudansa klimátika nian,” informa Provedoria Diretu Umanu no Justisa, Jesuina Maria Ferreira Gomes.
Nia dehan, Timor-Leste tama mós iha risku ba mudansa klimátika iha Rejiaun Sudeste Aziátiku hanesan rai nakdoko, anin boot, udan boot no inundasaun hodi afeta direta ba diretu ema nian, liuliu asesu ba asisténsia sosiál sira.
Semináriu ne’ebé halo abertura husi Sekretáriu Estadu Meiu Ambiente, Demetrio Amaral de Carvalho ne’e, atu esplora oportunidade entre nasaun membru sira hodi servisu hamutuk ba rezolve problema mudansa klimátika iha Timor-Leste no Rejiaun Sudeste Aziátiku iha futuru.
Jornalista : Nelson de Sousa
Editór : Francisco Simões
