DILI, 29 jullu 2019 (TATOLI) – Ministru Justisa (MJ), Manuel Cárceres, rekoñese katak, kondisaun Prizaun Becora naresin ona (over capacity) relasiona ho númeru dadur ne’ebé aumenta ba na’in 656.
Ba kestaun nee, Ministru Manuel Cárceres da Costa hateten, Governu labele halo milagre, tanba sosiedade laiha konsiénsia no responsabilidade nasionalizmu atu evita krime oi-oin ne’ebé mak akontese iha rai laran.
“Ita rekoñese kondisaun Prizaun Becora naresin, maibé labele halo milagre tanba ita nia sosiedade sira mós laiha konsiénsia no laiha responsabilidade nu’udar sidadaun di’ak oinsá evita krime,” hateten Ministru Manuel Cárceres da Costa, ohin, ba Ajénsia TATOLI, iha nia knaar fatin Caicoli, Dili.
Nia apela ba sidadaun sira hotu, liuliu joven timoroan tomak atu hatudu komportamentu di’ak ba nasaun, iha responsabilidade nasionalizmu nune’e labele komete krime.
“Atu redús kuantidade prezu, mak sosiedade sira tenke iha responsabilidade nasionalizmu, liuliu joven timoroan sira hotu tenke iha komportamentu di’ak ba nasaun, kumpre lei katak labele halo krime,” afirma Manuel Cárceres da Costa.
Iha biban seluk, Diretór Estabelesimentu Prizaun Becora, João Domingos mós rekoñese katak oras daudaun númeru ema dadur iha Prizaun Becora sa’e ba na’in 656 kompostu hosi Prezu preventiva nian 180 no arguido prezu tránzitu einjulgadu hamutuk na’in 476.
“Hanesan ema hotu hatene katak, hosi semana kotuk mai too agora iha arguido foun balu mak tama tan mai ona iha Prizaun Becora, entaun sira ne’e hotu hamutuk dadur na’in 656,” João Domingos hateten.
Diretór ne’e hatutan, ba dadur foun sira ne’ebé aumenta iha Prizaun Becora, barak liu mai ho krime omisídiu grave ba kazu Leorema, krime tentativu omisídiu no krime arma branka.
Diretór Estabelesimentu Prizaun Becora ne’e dehan, kona-ba kondisaun atu akomoda hotu prezu sira ne’e, over capacity ona, tanba prezu barak demais.
“Ha’u hanoin labele segredu ona, tenke nakloke ba públiku nune’e públiku mós hatene katak kondisaun Prizaun Becora over capacity,” hateten João Domingos
Maski nune’e governu liuhosi ministériu justisa, diresaun estabelesimentu Prizaun Becora kontinua halo jestaun ne’ebé di’ak oinsá bele rezolve problema hirak ne’e. Nune’e ba direitu prizioneiru sira nian sempre asegura nafatin.
Diretór mós informa tan katak, iha semana kotuk, diresaun Prizaun Becora foin transfere tan prezu na’in 22 ba Prizaun Suai no na’in 17 ba Prizaun Gleno.
Jornalista : Domingos Piedade Freitas
Editór : Francisco Simões
