DILI, 19 agostu 2019 (TATOLI)-Polisia Nasionál Timor-Leste (PNTL sigla-portugés) hamutuk ho Parseiru Programa Dezenvolvimentu Polisia Timor-Leste (TLPDP-sigla inglés) polisia Federál Australia, ohin, inaugura uma unidade pesoál Vulneravel Munisípiu Dili.
Ho fasilidade uma Unidade Pesoál Vulneravel ne’ebé estabelese iha Polisia Munisípiu Dili nia arredores ne’e atu fasilita liu tan servisu PNTL hodi fó atendimentu ba komunidade liu-liu ba labarik no inan feton ne’ebé sai vítima ba violénsia seksuál ho violénsia doméstika.
Uma ho fasilidade ne’e ofisiálmente inaugura husi Segundu Komandante Jerál PNTL Komisáriu Mateus Fernandes, akompaña husi komandante TLPDP-polisia Federál Australia Geof Turner, no partisipa direita husi komandante kargu xefia PNTL, reprezentante Embaixada Nova Zelándia, Embaixada Indonézia, lider komunidade Suku Caicoli no konvidadu sira seluk.
Komisáriu Mateus Fernandes, lori Komandu PNTL nia naran hato’o agradese wain ba parseiru PLPDP ne’ebé bele tulun ona servisu PNTL nian hodi harii uma foun ida ne’e.
Tuir nia, asuntu vulneravel pesoál hanesan ameasa nasionál. Tanba ameasa ba labarik no inan feton sira. Ho ida ne’e, TLPDP ne’ebé tau atensaun tebes, liu husi kria kondisaun ne’ebé iha.
“Ba oin PNTL sei fó atendimentu di’ak liu tan ba komunidade sira liu-liu iha Munisípiu Dili,” afirma Segundu Komandante PNTL Komisáriu Mateus Fernandes.
Segundu komandante PNTL husu ba membru PNTL sira atu utiliza fatin ne’e ho kuidadu. Tanba uma ne’e apoiu husi TLPDP ho Totál orsamentu $30.000,00.
Uma ne’e rasik, kompleta ho fasilidade servisu nian ho Komputadór 8, meza-kadeira ne’ebé apoiu husi TLPDP. Nune’e mós iha fatin ba atendimentu entrevista vítima sira, aula pesoál PNTL tur fatin hala’o servisu, hariis fatin, kompleta ho bee moos no sira seluk tan.
Jornalista : Nelson de Sousa
Editór : Francisco Simões
