DILI, 27 setembru 2019 (TATOLI)-Dadur hamutuk na’in 32, ohin, simu sertifikadu nivel báziku língua Portuguesa hafoin partisipa formasaun durante oras 90 ne’ebé hahú iha Fevereiru no remata iha fin Jullu 2019 iha Prizaun Becora, Dili.
Notísia Relevante: MJ-Embaixadór Portugal Lansa Formasaun Lian-Portugés Ba Dadur Sira
Formasaun ne’e inisia ho númeru partisipante dadur 54, maibé na’in 22 la-konsege finaliza tanba hetan ona liberdade no balun transfere ona ba Prizaun Gleno, Munisípiu Ermera no Prizaun Suai, Munisípiu Covalima.
Iha ezame ikus formadu 32 ne’e na’in sia la konsege pasa tanba la prienxe valór ne’ebé estabelese, maibé formadór sira konsidera dadur na’in sia ninia partisipasaun hodi fó mós sertifikadu apresiasaun.
Ministru Justisa Manuel Cárceres da Costa, ne’ebé ofisializa atribuisaun sertifikadu ba prezu hirak ne’e hateten, formasaun ne’e parte ida husi programa reinsersaun sosiál hodi prepara kapasidade no koñesimentu dadur iha área língua Portuguesa.
“Iha tinan oin finansiamentu ne’e mai husi Gabinete Primeiru-Ministru liuhusi Fundu Apoiu Sosiedade Sivíl serbisu hamutuk ho Embaixada Portugal no Fundasaun Oriente,” informa Manuel Cárceres da Costa.
Governu mós iha ona planu atu fó mós formasaun ba dadur sira iha Prizaun Gleno no Suai. Alende formasaun língua Portuguesa, governu sei reforsa formasaun iha área karpintaria, kustura, pedreiru no seluk tan.
Embaixadór Portugal iha Timor-Leste, José Pedro Machado Vieira informa, projetu ne’e importante atu hasae koñesimentu no kapasita Timoroan sira iha área língua Portuguesa.
Jornalista : Agapito dos Santos
Editór : Francisco Simões
