DILI, 9 outubru 2019 (TATOLI)–VIII Governu Konstitusionál lideradu Primeiru-Ministru, Taur Matan Ruak, presiza diversifika setór agrikultura.
“Ha’u hanoin kada tinan ita tenke tau orsamentu barak liu iha agrikultura tanba atu diversifika ekonómika iha agrikultura importante tebes”, Deputadu Bankada FRETILIN, Fabião de Oliveira, ko’alia asuntu ne’e iha resintu Parlamentu Nasionál, kuarta ne’e.
Deputadu dehan, kuandu laiha preparasaun entaun imposível uituan atu bele atende investidór sira ne’ebé mai serbisu iha rai-laran.
Deputadu Bankada Opozisaun relata asuntu nune’e tanba Timor-Leste seidauk iha intensifikasaun internasionál kona-ba ai-han lokál nian.
“Entaun, atuál Governu presiza haree didi’ak buat sira hanesan ne’e, tanba ne’e baibain bankada opozisaun sempre ezije beibeik kona-ba diversifikasaun ekonómika iha setór agrikultura”, tenik nia.
Fabião afirma, setór agrikultura importante ba iha komunidade liliu ba agrikultór sira iha rai-laran.
“Setór agrikultura falla boot iha Governu anteriór nian ho programa dehan “Povu kuda Governu sosa” maibé saida mak akontese iha tempu agora (?)”, nia haktuir.
“Povu prepara tiha ninia ai-han liliu produtu lokál sira maibé Governu la ba sosa. Ida ne’e problema boot ida. Segundu, governu ba hola, hola de’it batar no hare kulit, depois laiha preparasaun armazén ida ne’ebé ho kondisaun di’ak”, nia hatutan.
Nia argumenta katak produtu lokál sira ne’e aat tanba laiha armazén ida ho temperatura konserva ai-han ne’ebé rai ba.
Tuir Fabião nia haree, iha tinan sanulu liubá saida mak akontese, ai-han ne’ebé Governu sosa iha povu, lori mai tau iha armazén aat hotu entaun estraga de’it no la funsiona.
Tanba ne’e, Fabião sujere, ba oin, Governu tenke tau orsamentu maka’as liu iha setór agrikultura tanba importante atu diversifika ekonomia liliu ba povu sira iha baze.
Nia salienta, bankada opozisaun haree orsamentu jerál Estadu ba tinan 2020 nian ho montante biliaun $1.95 no konsidera katak osan ne’e boot tebes, maibé investe barak liu iha bens serbisu.
“Tanbasá Governu la investe orsamentu barak liu iha setór agrikultura, edukasaun no saúde ne’ebé importante tebes ba iha nesesidade povu nian (?)”, Fabião kestiona.
Jornalista: Evaristo Soares Martins
Editór: Xisto Freitas
