DILI, 11 outubru 2019 (TATOLI) – Primeiru-Ministru, Taur Matan Ruak, hato’o pontu importante rua ba Banku Dezenvolvimentu Aziátiku (ADB) hodi ajuda dezenvolvimentu Timor-Leste.
“Primeiru-Ministru hato’o pontu rua mai ami. Ida katak populasaun Timor-Leste maioria sei joven entaun importante atu halo investimentu ba edukasaun hodi dezenvolve no kapasitasaun iha área oioin iha edukasaun vokasionál. Segundu nian mak hanesan bee no saneamentu atu halo projetu ne’e sai boot liután duké hanesan uluk,” tenik Diretór Jerál ADB ba Departamentu Rejional Sudeste, Ramesh Subramaniam, iha Paláçio do Governu, sesta ne’e.
Tanba ne’e, nia dehan, ADB mós toma nota hodi kumpre orientasaun ne’ebé Primeiru-Ministru hato’o.
Nia haktuir, hahú hosi Timor-Leste hamriik mesak nu’udar nasaun iha tinan 20 ba kotuk, ADB fornese ona rekursu finanseiru hamutuk tokon $400. Orsamentu ba projetu ativu ne’ebé sei ativu hela hamutuk millaun $360 ba leten.
“Ita haree, ba oin, Timor-Leste iha rendimentu ba investimentu ne’ebé boot. Entaun, ADB mós prontu fornese rekursu finanseiru ba iha área sira hanesan ohin ko’alia ho Primeiru-Ministru,” katak diretór ne’e.
Totál orsamentu ne’ebé ADB fó impresta ba Governu Timor-Leste hamutuk millaun $268.
“Ita haree ba Timor-Leste nia dezenvolvimentu entaun ADB fó asesu ba tipu impréstimu oin rua. Ida ho funan ki’ik pursentu 2 ka menus. Ida ho funan tuir merkadu internasionál entaun tuun sa’e, maibé agora besik hanesan ona ho pursentu 2 nian,” Ramesh esplika.
Jornalista: Hortençio Sanchez
Editór: Xisto Freitas
