DILI, 16 outubru 2019 (TATOLI) – Tribunál Distritál Dili (TDD), ohin, kontinua halo audiénsia julgamentu ba kazu ró ambulánsia ne’ebé atu fasilita transporta moras husi Atauro ho Oe-Cusse mai Dili.
Ró ne’e Governu liu husi Ministériu Saúde sosa iha tinan 2012, maibé la konsege utiliza ho di’ak tanba at tiha de’it. Tanba ne’e, fó prejuízu ba Estadu $414,876.64.
Iha kazu ne’e Ministériu Públiku (MP) notifika arguido na’in ualu (8) kompostu husi arguido AMPM, arguido LB, arguida EJA, AC, JFOC, JCS, JCM ho DG. Arguido sira ne’e mesak dirijente importante iha foti desizaun administrativa, finansa no aprovizionamentu iha Ministériu Saúde.
MP akuza arguido sira ba krime partisipasaun ekonomia no negósiu, borla agravadu no falsifikasaun dokumentu ne’ebé previstu iha artigu 299, 266, 267 husi kódigu penal TL, relasiona ho projetu fornesimentu ró ambulánsia tuir planu Ministériu Saúde (MS) iha tinan 2012.
Iha tinan 2012 husi dirasaun nasionál servisu ospitalares no Enkaminhamentu (DNSHE) iha planu atu sosa ró ambulansia hodi fasilita tula moras husi Atauro no Oe-Cosse mai Dili, maibé husi dirasaun nee rasik la halo estudu viabilidade la iha dezeñu no BoQ. Arguida AMPM haruka arguido JM ne’ebé nu’udar motorista atu maka prepara dezeñu ho espesifikasaun ba ró ambulánsia nian.
Ho koñesimentu ne’ebé mukit liu kona-ba dezeñu ró ambulánsia, arguido JM ba iha Unidade polisia Marítima husu dezeñu no espesifikasaun ró nian.
Bainhira hetan tina dezeñu espesifikasaun ró nian husi UPM, arguido JM entrega dezeñu espesifikasaun ba iha arguida AMPM, nune’e AMPM la halo rekomendasaun ba iha ministru saúde atu nomea tékniku sira ne’ebé iha koñesimentu ba ró nian hodi halo estudu viabilidade ba dezeñu espesifikasaun tanba ministériu saúde la iha tékniku pesoál ba ró nian.
Arguida AMPM foti dezeñu espesifikasaun husi UPM hodi haruka arguido CV ne’ebé momentu nee nu’udar diretór DNHSE ein- ezersísiu tanba arguida AMPM lisensa partu halo pedidu ba vise ministra saúde atu aprova orsamentu ba sosa ró ambulansia.
Bainhira simu tiha pedidu nee iha loron 2 fulan marsu 2012 vise ministra saúde hatún despaixu ba arguida EJA nu’udar diretora finansas atu prepara CPV ho PR.
Dezeñu ho espesifikasaun la iha maibé iha loron 8 fulan marsu 2012 Aristider M de M Carvalho prepara CPV ho montante $500,000,00 ne’ebé halo uluk sertifikasaun husi arguido LB iha loron 12 marsu tinan 2012 foin hetan autorizasaun husi arguido JRM iha loron 19 Marsu 2012 hetan aprovasaun husi Vise Ministra Madalena Hanjam.
Antes ministra saúde aprova CPV no PR, iha loron 10 Marsu 2012 dirasaun nasionál administrasaun lojístika no aprovizionamentu hahú lansa konkursu públiku ba projetu fornesimentu no instalasaun ba ró ambulance iha ministériu saude ho tipu International Competitive Bidding ka konkursu internasionál.
Iha membru Komisaun Aprovizionamentu Ministériu Saúde (KAMS) kompostu husi arguido LB nu’udar presidente KAMS, arguido AC nu’udar sekretáriu KAMS, arguido JFOK nu’udar membru permanente KAMS, arguido EJAM nu’udar membru permanente KAMS, arguido JCS nu’udar mós membru permanente KAMS, no arguido JCM nu’udar membru variavel KAMS.
Lansamentu konkursu fornesimentu ba ró ambulánsia nee iha kompañia lima maka submete ba sira nia proposta hanesan kompañia PT, Samudra Indora persaka (SIP) CV, Bintang Samudra Juran Jawa Unip Lda, hahú halo abertura ba proposta husi kompañia lima ne’ebé hatama ona sira nia dokumentu konkursu nian.
Iha loron 16 marsu 2012, ekipa KAMS nain rua arguido AC ho JCM ho asesór Jayendra Batta hahú abertura ba kompañia lima ne’ebé hatama dokumentu konkursu nee.
Husi kompañia lima ne’ebé submete ona ba sira nia proposta ekipa avaliasaun KAMS fó de’it Pontus avaliasaun ba kompañia tolu maka hanesan PT, Samudra Indoraya Perkasa (SIP) hetan valor 74, CV Bintang Samudra hetan valor 70, Joran Jawa unip hetan valor 59 Lda. Enkuantu kompañia seluk hanesan Oceen Lda, no PT Kaha Jaya Marine ekipa avaliasaun KAMS la fó pontu avaliasaun. Ho nune’e, ekipa KAMS rekomenda kompañia PT Bintang Samudra sai vensedór iha konkursu ida nee.
Iha loron 15 fulan juñu 2012 ekipa KAMS halo relatóriu avaliasaun indika ba kompañia PT primeira lugar ho valor 74 iha konkursu nee. Kompañia Samudra SIP sai segundu lugar ho valor 70 ba konkursu ida nee.
Tuir mai ekipa avaliasaun deside hodi rekomenda atu halo adjudikasaun ba kompañia PT, Samudra Indoraya Perkasa, nu’udar nanan nain ho kontratu $423,343,51 ho durasaun kontratu ba loron 90 nia laran.
Iha loron 12 jullu 2012, Ministériu Saúde ne’ebé reprezenta husi Diretor Jerál, Agapito da Silva Soares, selebra kontratu ho kompañia PT SIP ne’ebé reprezenta husi arguido DW tuir karta prokurasaun, ho kontratu $423,343,51 hodi fornese no instala ró ambulánsia ministériu saúde ho durasaun fulan tolu, hahú husi loron 10 fulan jullu 2012 too iha loron 9 fulan outubru 2012.
Depois asina tiha kontratu refere iha loron 6 too iha loron 9 fulan agostu 2012 ekipa inspesaun ba material konstrusaun ró ambulánsia ne’ebé kompostu husi arguido JCS, JMM, RI ho JCM nu’udar membru variavel iha KAMS, arguido AC nu’udar tékniku jestaun ba kontratu no Jayhendra Bhatta nu’udar asesór aprovizionamentu ba halo inspesaun material konstrusaun ba ró ambulánsia iha Surabaya-Indonézia.
Rezultadu husi inspesaun hatudu katak konstrusaun ró refere nian progresu fiksu inklui material ne’ebé atinje ona ba 50% ho medida 11,97 metru.
Alende ida nee ekipa inspesaun ba armazén kompañia PT SIP hodi observa katak material konstrusaun ró ambulánsia nee tuir duni espesifikasaun tékniku ne’ebé mensiona iha kontratu refere.
Iha loron 10 outubru 2012, dirasaun nasionál administrasaun lojistiku no aprovizionamentu arguido LB hato’o pedidu desizaun no aprovasaun ekipa inspesaun ró ambulansia ba iha Surabaya ba segunda faze ne’ebé kompostu husi Jayendra Bhatta nu’udar asesór aprovizionamentu, Alvaru Abrantes nu’udar tékniku espesialista.
Audiénsia julgamentu nee preside husi juis koletivu Sribuana da Costa, Albertina Neves, Antonio Helder do Carmo, MP reprezenta husi Prokuradór Rogerio Viegas no arguido sira asisténsia legal husi defensór públiku inklui mós advogadu privadu sira.
Deklarasaun Arguida AMPM nian
Liu husi audiénsia julgamentu ne’e, arguida AMPM deklara ba Tribunal katak planu sosa ró ambulánsia ne’e halo planu ba estudu viabilidade.
“Ha’u hanesan arguida deklara katak laiha koñesimentu ba tenderizasaun ba ró ambulánsia refere, maibé ha’u rekoñese halo aprovasaun ba rezultadu avaliasaun konkursu tenderizasaun refere,” hateten AMPM.
Iha fatin hanesan arguido JCS mós informa katak nia parte laiha koñesimentu mós kona ba prosesu tenderizasaun nee no nia parte halo tanba tuir de’it orientasaun husi dirijente sira.
JCS mós afirma liu tan katak sira deside kompañia SIP mak sai vendedór, tanba sira prienxe dokumentu.
Jornalista : Domingos Piedade Freitas
Editór : Francisco Simões
