DILI, 08 janeiru 2020 (TATOLI)–Prezidente klube Assalam FC, Ipolito Soares, hateten tinan ne’e Governu la fó ona subsidiu ba klube hotu iha Liga Futeból Amadora (LFA) hanesan todan boot ida tanba Governu ladùn suporta atividade futeból iha Timor-Leste.
“Assalam sente todan no triste wainhira Governu la suporta futeból. Subsídiu ba klube ne’e Governu fó serbisu ba joven atleta indiretamente tanba klube selu jogadór nia saláriu liuhusi subsídiu Governu ne’e,” Ipolito ba Agência Tatoli iha nia knaar fatin, kuarta ne’e.
Nia dehan, bainhira Governu hapara subsídiu ba klube hanesan hapara kampu traballu ba joven sira.
Maibé, tuir nia, Assalam kontinua partisipa iha Liga Futeból Amadora (LFA) époka 2020 maski Governu la fó subsídiu.
“Assalam partisipa nafatin maibé parase jogadór lahó saláriu. Ida-ne’e afeta ba kualidade liga ne’ebé ita hotu mehi hakarak hola parte iha Asian Football Confederation (AFC) no kompetisaun internasionál seluk,” nia haklaken.
Antes ne’e, Sekretáriu Estadu Juventude no Desportu (SEJD), Nélio Isaac Sarmento deklara katak ko’a orsamentu hosi SEJD ne’e kuaze la fó impaktu ba atividade desportu hotu iha 2020, maibé nia impaktu ne’e mak klube sira no ema sira partisipa iha Liga hanesan futeból, basketból, voleiból no modalidade seluk tan mak sei la hetan subsídiu.
Nia esplika, orsamentu ne’ebé atu aloka na SEJD hamutuk millaun $9.7 maibé orsamentu refere lori ba Parlamentu Nasionál no haruka fila ba Governu redús tiha millaun 3 no daudaun ne’e SEJD hela de’it millaun $6 resin.
Jornalista: Hortençio Sanchez
Editór: Xisto Freitas
