DILI, 17 janeiru 2020 (TATOLI)–Ministru Obra Públika, Salvador Eugénio Soares dos Reis Pires, informa reseita ne’ebé kobre husi Diresaun Jerál Água no Saneamentu (DGAS-sigla portugés) iha tinan 2019 konsege sa’e, kompara ho tinan 2018 tanba parte diresaun konsege hadi’a atendimentu públiku.
“Iha novembru 2019 ita aloka ona fatin estasaun atu halo pagamentu iha fatin tolu hanesan Becora, Caicoli no Ai-Mutin. Iha 2018 ne’e komesa hetan reseita $60.000 resin, maibé iha dezembru 2019 komesa kobre $114.000 tanba halo instalasaun, hadi’a ekipamentu no loke counter atu komunidade bele besik liu atu halo pagamentu ba bee”, tenik Salvador iha diskusaun jeneralidade ba proposta Orsamentu Jerál Estadu 2020 iha plenária Parlamentu Nasionál, sesta ne’e.
Governante ne’e dehan, kona-ba kontadór prepagu foin lalais konsege instala tan unidade 1.000 no hadi’a purvolta 3.000, ne’ebé ninia kustu prevee ona iha Orsamentu Jerál Estadu (OJE) 2018.
“Uluk kliente sira tenke forma hodi selu iha banku no dala barak kustu transporte atu ba selu boot liu fali duké atu selu bee ne’ebé sira uza ba Diresaun Jerál Água no Saneamentu”, nia akresenta.
Iha tinan 2019, Governu aloka orsamentu liuhosi Ministériu Obra Públika ba Diresaun Jerál Água no Saneamentu hamutuk millaun $12,881, ne’ebé totál orsamentu ne’e inklui ona ho planu urbanizasaun.
Jornalista: Julia Chatarina
Editór: Xisto Freitas
