DILI, 27 janeiru 2020 (TATOLI) – Juiz Administradór Tribunal Distritál Dili (TDD), Afonso Carmona, ohin, informa, durante loron lima Tribunal movel konsege prosesa kazu krime hamutuk 24 iha Liquiça ne’ebé pertense ba area jurizdisaun TDD.
Notiísia Relevante : Konsellu Koordenasaun Justisa Reformula Tribunál Movel
“Julgamentu movel TDD ne’ebé mak hala’o iha Liquiça konsidera lao di’ak no susesu durante loron lima nia laran,” hateten Juiz Afonso Carmona, ohin, hodi responde Ajénsia TATOLI iha TDD.
Nia dehan, husi segunda to’o sesta Tribunal movel prosesa kazu krime ho natureza públiku, semi públiku, violénsia doméstika no violénsia seksuál hamutuk 24, konsege julga kazu hamutuk 22 no rua mak la bele julga, tanba arguido ida la notifikadu no ida seluk ho Polisia buka la iha hela fatin.
Julgamentu movel ne’e realiza iha eskuadra Polisia Nasional Timor Leste, Munisipiu Liquiça ho juiz koletivu rua kompostu husi Juiz Antonio Fonseca, Juiz Afonso Carmona no Juiz Evangelino Belo.
Jornalista : Domingos Piedade Freitas
Editór : Francisco Simões
