DILI, 19 fevereiru 2020 (TATOLI)–Tribunál Rekursu (TR) liuhosi desizaun akórdaun finál kondena arguidu Calisto Gonzaga ho pena prizaun tinan-tolu (3) no suspende ba tinan haat (4).
Notísia Relevante : Kazu Calisto Gonzaga Pendente Hela iha TDD
Ministériu Públiku akuza krime sequestro iha artigu 160 númeru 1,2 iha kódigu penál Timor-Leste.
Depoimentu Ministériu Públiku akuza arguidu Calisto Gonzaga, ho krime konkursu abuzu podér iha artigu 294, Kódigu Penál Timor-Leste hafoin Tribunál Distritál Dili (TDD) halo fali alterasaun kualifikasaun jurídika ba krime iha artigu 274 Kódigu Penál Timor-Leste, ho krime sequestro artigu 160 númeru 1 no 2 iha Kódigu Penál Timor-Leste.
Desizaun no notifikasaun Tribunál Rekursu nian ba Calisto Gonzaga ne’e fó sai loron 18 fevereiru 2020, tuku 10:00 Otl.
Defeza Sérgio Quintas hatete, nu’udar mandatóriu nia parte simu ona notifikasaun hosi TR ba prosesu ida-ne’e tama ona nia finalidade katak, desizaun tránzitu ein-julgadu.
Mezmu nune’e, Sérgio Quintas, la satisfás ho desizaun TR nian ba nia kliente tanba ho prosesu transmitasaun ne’ebé demora dezde 2012 to’o agora foin iha desizaun finál.
“Devia arguidu labele hetan kondenasaun, maibé hetan absolvisaun tanba durante ne’e mós arguidu hatudu komportamentu di’ak iha sosiedade. La halo tan krime ruma hafoin hetan problema justisa, maibé desizaun tribunál nian ne’e finál ikus liu ona tránzitu ein-julgadu, labele halo tan buat ida,” hateten Sérgio Quintas.
Akórdaun Tribunál Rekursu nian ne’e prezide hosi koletivu Juis Tribunál Rekursu, Maria Natércia Gusmão, Jacinta Correia da Costa ho Duarte Tilman Soares. Kazu ne’e rejista ho númeru Nuc:1227/12/PDDDIL.
Jornalista : Nelson de Sousa
Editór : Francisco Simões
