DILI, 17 marsu 2020 (TATOLI) – Primeiru-Ministru (PM), Taur Matan Ruak konvoka reuniaun ho Konsellu Administrasaun Fundu Infraestrutura (KAFI), ne’ebé partisipa husi entidade relevante hodi deside pontu importante sira hodi bele atende ba dezastre naturál ne’ebé akontese iha sesta (13/03).
Entidade Relevante ne’ebé partisipa iha enkontru ne’e maka Ministru Obra Publika, Salvador Soares dos Reis Pires, Ministru Reforma Lejizlativa no Asuntu Parlamentár, Fidelis Manuel Leite Magalhães, Ministru Transporte no Komunikasaun, José Agostinho da Silva, reprezentante husi Ministériu Planeamentu Investimentu no Estratéjiku (MPIE), Ministériu Finansa (MF), Ajénsia Dezenvolvimentu Nasionál (ADN) no Komisaun Nasionál Aprovijionamentu (CNA,sigla portugés).
Ministru Fidelis informa, asuntu ne’ebé deskute durante enkontru iha relasaun ho inundasaun no situasaun emerjénsia ne’ebé akontese iha Munisípiu Dili parte Sentru no Leste.
“Hosi enkontru ne’e hamosu pontu sira hanesan autoriza MPIE no MOP kria ekipa Task Force, ne’ebé sei lidera hosi Diresaun Jéral MOP hamutuk ho ADN. Deside mós hodi orienta ekipa Task Force ne’e halo lalais estimasaun kustu no ekipa ne’e tenke tun ba terenu halo estimasaun hotu no finaliza. Nune’e, bele aprezenta ba Konsellu Ministru kuarta (18/03)”, hateten Ministru Fidelis iha Palásiu Governu, tersa ne’e.
Ministru Koordenador Asuntu Ekonómiku interinu ne’e esplika liután, iha sorumutu ne’e ezekutivu sira autoriza mós ekipa Task Force atu identifika fatin sira-ne’ebé hetan estragu no tipu obra ba rekuperasaun nian.
Nune’e, desizaun KAFI nian atu identifika mós fatin apropriadu hodi bele fasilita obra servisu emerjénsia nian no identifika katak sei rekorre ba fundu kontijénsia no orienta ekipa atu tun emediata ba fatin sira hanesan Ponte My Friend, Bidau, Becusse, Hera, Maloa, Becora no Manleuana.
Aleinde ida-ne’e, KAFI husu atu ekipa bele atua ho urjénsia ba torre elétrisidade sira ne’ebé ameasadu no sistema kanalizasaun bee moos, nune’e deside mós atu kontinua halo limpeza ba uma-kain afetadu no halo protesaun vítima inundasaun.
Jornalista: Antónia Gusmão
Editora: Julia Chatarina
