TDD Aplika Aprezentasaun Periódika ba Arguidu Na’in-Hitu ba Kazu Furtu Agravadu
DILI, 27 maiu 2020 (TATOLI) – Tribunál Distritál Dili (TDD) aplika medida koasaun aprezentasaun periódika ba arguidu nain-hitu (7) tanba deskonfia komete kazu furtu agravadu.
Liuhusi audiénsia julgamentu iha Tribunál Distritál Dili (TTD), kuarta (27/05/2020), Prokuradór Hipolito Exposto, ne’ebé reprezenta Ministériu Públiku (MP) aprezenta faktu katak, iha loron 24 maiu 2020, iha Bairru Malinamuk, Aldeia Moris Foun, Suku Comoro, arguidu sira hamutuk nain-ualu (8) ho inisiál BEP, NPA, AJ, JC, JCF, ADS, COS no FS organiza malu hodi ba tama vítima ida nia rental hodi foti sasán eletrónika no sigarru ho kuantidade ne’ebé barak.
Ho aktu ne’e, MP akuza arguidu sira ho krime furtu agravadu ne’ebé previstu iha artigu 252 kódigu penál Timor-Leste ho nia moldura penal pena prizaun tinan-rua (2) to’o ualu (8).
Juiza singular Maria Solana, aplika medida koasaun aprezentasaun periódika ba arguidu ho inisiál BEP, NPA, AJ, JC, JCF, ADS, COS no arguidu FS aplika termu identidade rezidénsia (TIR).
Defeza Afonso Gomes, ne’ebé fó asisténsia ba arguidu sira konsidera razaun Tribunál aplika medida koasaun ba nia kliente nain-hitu (7) tanba iha produsaun prova iha indísiu forte ba envolvimentu kazu ne’e. Enkuantu ba arguidu na’in-ida (1) seluk hetan TIR tanba laiha indísiu.
“Tribunal aplika medida koasaun ne’e atu fasilita Ministériu Públiku halo investigasaun liu tan no arguidu sira koopera ho justisa,” hateten Defensor Públiku Afonso Gomes.
Jornalista : Nelson de Sousa
Editór : Francisco Simões
