DILI, 10 juñu 2020 (TATOLI)—Prezidente Komisaun A (Justisa no Konstitusionál), Deputadu Joaquim dos Santos, hateten esbosu Lei Kriminaliza Difamasaun labele viola fali prinsípiu konstitusionál sira-ne’ebé temi ona iha Konstituisaun RDTL.
Notísia Relevante: CI Konsidera Lei Kriminaliza Difamasaun Kontra Espíritu Konstituisaun RDTL
Deputadu Joaguim dos Santos, fundamenta Governu iha obrigasaun atu halo lei hodi garante sidadaun sira hotu bele ezerse, objetivu finál mak lori sidadaun hotu-hotu fó onra ba estadu, atu halo sidadaun hotu-hotu bele respeita malu iha regra demokrátika.
Tanba, tuir nia, prinsípiu fundamentál mak direitu demokrátiku ne’ebé signifika katak sidadaun ida-idak nia hahalok hotu-hotu tenke bazeia ba lei.
“Maibé keta haluha lei ne’ebé Parlamentu ka Governu prodús karik, labele viola fali direitu seluk. Tanba ne’e mak Parlamentu atu hasai lei ida atu proposta hosi Governu ka projetu hosi deputadu sira tenke haree garantia konstitusionál ne’ebé rezerva Liberdade espersaun, Liberdade organizasaun no Liberdade direitu onra. Lei ne’ebé atu hamosu ne’e labele viola fali prinsípiu sira-ne’e,” dehan Deputadu Joaquim dos Santos a jornalista sira iha resintu Parlamentu Nasionál, kuarta ne’e.
Reprezentante Povu iha Uma Fukun Parlamentu Nasionál ne’e afirma, la’ós halo lei atu taka fali dalan ba ema labele krítika. Se ida-ne’e mak akontese, ne’e labele.
“Kualkér desizaun polítika ne’ebé sai ba lei tenke respeita imperativu konstitusionál ne’ebé proteje sidadaun sira-nia direitu,” nia dehan.
Komisaun A hein hela proposta lei, karik Governu liuhosi Ministériu Justisa (MJ) haruka ba Parlamentu Nasionál.
“Se artigu balun ne’ebé viola sidadaun nia direitu ne’ebé ke konstituisaun fó ita hasai tiha. Se artigu balun ne’ebé atu garante sidadaun sira atu respeitu malu, ita hatama. Lei ne’e nia objetivu atu garante estabilidade polítika no sosiál, liuliu lori ita ba respeita malu, respeita konstituisaun. Se desizaun ne’ebé atu sai ba lei ne’e la viola konstituisaun ita aprova, importante mak tenke bazeia ba prinsípiu Estadu Direitu Demokrátiku,” dehan Prezidente Komisaun A ne’ebé trata asuntu Justisa no Konstitusionál ne’e.
Notísia Relevante: Governu Presiza Rona Komunidade Mídia-Sosiedade Sivíl ba Lei Kriminaliza Difamasaun
Jornalista : Evaristo Soares Martins
Editór : Cancio Ximenes
