DILI, 18 juñu 2020 (TATOLI) – Ajénsia Kooperasaun Internasionál Japaun (JICA, sigla inglés) iha Timor-Leste liuhosi Xefe Reprezentativu, Masafumi Nagaishi entrega ekipamentu inspesaun ba auditór tolu Camâra de Contas (CdC).
Ekipamentu sira ne’e mak hanesan teste konkretu hammer proceq DigiSchmidt tipu ND/LD ida, unidade kompasu kabibre vernier/sigmat manual 8” (0-200mm) hamutuk rua, SHINWA crack scale card tipu 58699 ida no Laser automátiku meter ida.
Tuir nota imprensa ne’ebé Agência Tatoli asesu katak objetivu husi apoiu ekipamentu sira ne’e atu apoiu serbisu auditór sira no kontribui ba melloramentu serbisu auditoria ne’ebé hala’o hosi CdC.
Apoia ne’e mós atu utiliza halo inspesaun no ezamina projetu konstrusaun sira ne’ebé Governu Timor-Leste implementa iha rai-laran.
Inisiativa ne’e hanesan kontinuasaun no kompromisu JICA Timor-Leste atu apoiu Assosiasaun Alumni JICA Timorense (TJAA), liuliu ba auditór na’in-tolu hanesan Hermengildo Guterres Amaral, Jose Gouveia Lopes no Silvino Mau Curu husi CdC hafoin partisipa iha ajénsia kooperasaun nia treinamentu kona-ba “Government Audit on Public Construction Works”, iha Tokyo, Japaun.
Dezde estabelese, JICA mantein kontribui ba dezenvolvimentu nasaun Timor-Leste, liuliu kontribusaun ba dezenvolvimentu rekursu umanu liuhosi oportunidade ba kapasitasaun, formasaun no treinamentu ba funsionáriu públiku husi ministériu no institusaun sira.
Jornalista: Florêncio Miranda Ximenes
Editora: Julia Chatarina
