DILI, 07 jullu 2020 (TATOLI)-Organizasaun arte marsiál Ikatan Keluarga Silat (IKS) Timor-Leste (IKS.TL) Kera Sakti kontinua halo esforsu hodi bele kumpre regra no rekizitu sira hosi Governu liuhosi Komisaun Reguladóra Arte-Marsiais (KRAM )hodi bele formaliza ka rejistu.
Notísia Relevante : KRAM Sosializa Regra Arte Marsiál Ba PSHT, IKS ho KORK
Foin lalais ne’e KRAM introdús ona rezolusaun Governu númeru 4/2020, 2 marsu ne’ebé revoga tiha rezolusaun númeru 16/2013 hodi fó informasaun ba GAM tolu hanesan Persaudaraan Setia Hati Terate (PSHT), IKS.TL Kera Sakti ho Kmanek Oan Rai Klaran (KORK) atu formaliza organizasaun molok reativa atividade treinu.
Ba Agência Tatoli, ohin, iha Tribunál Distritál Dili (TDD) Prezidente IKS.TL Kera Sakti ,Silvestre Xavier Sufa hateten, parte Kera Sakti nian daudaun esforsu hela hodi buka bele formaliza hodi iha lejitimidade.
“Ba prosesu no kritéria sira ne’e ami prienxe hotu ona, liu-liu kritéria KRAM nian númeru 1 to’o 8 kona-ba estutu, organigrama, rejimentu, mapa lokalizasaun sede no tenke iha asembleia jerál no hatama membru IKS.TL Kera Sakti total iha territóriu laran. Buat sira-ne’e hotu preparadu hotu ona, maibé sei presiza halo edisaun ba liafuan balun iha redasaun no hein katak iha tempu badak sei submete ba KRAM,” Silvestre Xavier Sufa esplika.
Prezidente IKS.TL Kera Sakti, Silvestre Xavier Sufa hateten, sira-nia parte kontinua kolabora ho Governu hodi kumpre rekizitu hirak ne’e hotu molok reativa.
“Ami prontu koopera ho Governu. Ami mós iha regra internu ba oin hodi organiza funsionamentu organizasaun nian hodi kontribui ba paz no dezenvolvimentu,” Silvestre Xavier Sufa hateten.
Notísia Relevante : IKS.TL Kera Sakti Sei Kolabora ho KRAM Atu Hetan Lejitimidade
Jornalista : Nelson de Sousa
Editór : Francisco Simões
