DILI, 08 jullu 2020 (TATOLI) – Governu liuhosi Sekretáriu Estadu Arte no Kultura (SEAK), Teofilo Caldas, hatete governu sei la abandona grupu arte moris.
“Espasu rai ne’e luan tebes purvolta metru 21.770 kuadradu, ami iha ona dokumentu kompletu. Maibé desizaun Xefe Governu hakarak fasilita ita-nia veteranu sira iha edifíisiu Arte Moris ne’e ami la kompromi, ita prontu kumpre orientasaun fasilita no koopera hodi implementa. Tanba ne’e ita lakohi debate ka deskute, ita prontu buka fali fatin seluk ba grupu Arte Moris”, katak Teofilo ba TATOLI iha ninia servisu fatin Praia dos Coqeiros, ohin.
Nia akresenta Governu sei la abandona Grupu Arte Moris bainhira sira sai ona husi edifísiu refere, tanba Governu hakarak fasilita fatin foun ba sira.
“Ha’u haree ona espasu Casa Europea ne’e atu entrega fali ba grupu arte moris atu hala’o sira nia atividade. Maibé ha’u mós sei hato’o fali karta ba Ministériu Justisa no Terras Propriedade atu bele atribui fali espasu seluk mak hanesan Casa Eropeia no terrenu mamuk ida iha Palásiu Prezidensiál nia kotuk”, esplika.
Tuir estatutu fatin Arte Moris Dili nian, Ministériu Justisa liuhosi Sekretáriu Estadu Terras no Propriedade entrega ona ba SEAK ho Ministériu Ensinu Superiór Siénsia no Kultura (MESSK) atu uza hanesan edifísiu akadémiku arte Indústria Kultura no Sentru Kultura iha futuru.
Desizaun hasai Grupu Arte Moris husi fatin ne’ebá, nia tenik tanba bazeia ba orientasaun husi Xefe Governu, Taur Matan Ruak, ne’ebé planea atu entrega fatin ne’e ba veteranu sira atu uza.
Jornalista: Tomé Amado
Editór: Agapito dos Santos
