DILI, 16 jullu 2020 (TATOLI) – Tribunál Distritál Dili (TDD) liuhosi Juiz titulár João Ribeiro, omóloga arguidu ho inisiál FA ne’ebé komete krime ofensa integridade fízika simples atu hadook ona hosi asaun violentu mezmu lezadu AM perdua ona arguidu iha Tribunál.
Tuir kronolojia ne’ebé arrola hosi Ministériu Públiku katak, iha loron 8 agostu 2019, iha Kulu-hun, Dili, arguidu FA ho ódiu lansa ameasa to’o tuku-tebe lezadu AMtanba de’it dehan lezada nia aman mak tiru nia maun-alin na’in tolu mate iha trajédia Kulu-hun.
Antes atu hahú julgamentu ne’e tuir lei Tribunál husu lejitimidade ba lezadu tanba krime ne’ebé arguidu FA halo hasoru lezadu AM nia natureza semi-públiku ne’ebé depende ba keixa. Tanba ne’e, Tribunál husu atu lezadu taka prosesu, nune’e lezadu mós konkorda hakarak taka prosesu, maibé tenke iha kondisaun ida.
Lezadu foin atu halo tinan 15 (idade menoridade) iha sala audiénsia ne’ebé reprezenta de’it lezadu nia inan AB, husu ba arguidu atu labele repete tan hahalok kriminál.
AB husu mós atu soe liafuan kro’at ne’ebé sempre hodi ameasa malu no hatán ba ida-ne’e, arguidu mós perante iha Tribunál katak nia sei la komete hahalok sira ne’e.
Juiz João Ribeiro mós husu arguidu atu labele repete liafuan no aktu violentu no oinsá fó kontribuisaun ba paz ho ida-idak haree nia atividade hanesan estudante atu haree de’it ba eskola.
Hafoin parte sira simu malu Tribunál husu arguidu ho lezadu konsege dame malu, nune’e Tribunál omóloga kazu refere (dada fali).
Iha julgamentu ne’e Ministériu Públiku reprezenta hosi Prokuradór Hipolito Santa no arguidu hetan asisténsia legal hosi Defeza Fernando da Costa.
Jornalista : Nelson de Sousa
Editór : Francisco Simões
