DILI, 21 jullu 2020 (TATOLI) – Ministériu Públiku (MP) akuza arguidu ho inisiál JDS ho krime furtu agravadu tanba tuku rahun “ekran” (layar) mákina roulette iha fatin jogu kazinu ne’ebé lokaliza iha area Timor Plaza nian.
Loloos, ohin, Tribunál Distritál Dili (TDD) rona deklarasaun arguidu nian, maibé arguidu la marka prezensa tanba iha família mate, nune’e, sei marka iha loron seluk. Ho nune’e, Tribunál kontinua rona lezadu nia depoimentu.
Tuir aktu ne’ebé arrola hosi Ministériu Públiku (MP) katak, iha loron 21 outubru 2016, purvolta tuku 03:10 madrugada, iha Timor Plaza, area jogu aposta ho tipu kazinu iha Dili, arguidu hemu tua no ho kondisaun lanu tama ba iha fatin refere hodi joga roleta iha mákina roulette númeru R-16.
Bainhira arguidu komesa joga ona iha mákina refere arguidu lakon tan osan ne’ebé arguidu lori hodi joga. Tanba ne’e maka arguidu ho kondisaun lanu no nervozu tuku kedas dala ida ho maka’as ba iha roulette nia “ekran” (layar) to’o hetan estraga.
Konsekuénsia hosi aktu ne’ebé arguidu halo hasoru lezadu LDO hanesan nain ba jogu refere rezulta roleta iha mákina númeru R-16 hetan estragu ne’ebé hamosu prejuizu patrimonial ba lezadu korresponde ho valór $2.000,00.
Arguidu halo hahalok ne’e, livre, deliberada no konsientemente, hatene katak bainhira hodi liman tuku ho maka’as ba iha “ekran” roulette nian bele harahun vidru refere, arguidu hatene momoos katak sasán ne’e la’ós arguidu nian.
Hahalok ne’ebé arguidu halo, kontra vontade hosi sasán nain, maibé arguidu hakarak halo hodi kontra lei.
Arguidu hanesan autór material ho forma konsumada ba krime danu agravadu ne’ebé previstu artigu 259.
Lezadu ho inisiál LDO deklara ba Tribunál katak, dezde arguidu estraga nia sasán nia rasik mak hasai fali osan ho valór $2.000,00 hodi hadi’a rasik no hafoin akontesimentu nia parte sai vítima to’o agora arguidu la mosu no hasoru nia tanba nia hakarak husu Tribunál atu buka justisa.
Hafoin rona tiha deklarasaun ne’e, Tribunál deside adia hikas fila-fali julgamentu ne’e ba iha loron 10 agostu, tinan ne’e, iha tuku 15:00 otl.
Audiénsia Julgamentu ne’e prezide hosi Juis koletivu Ana Paula Fonseca, Ivan Suritai, Maria Solana, Ministériu Públiku reprezenta hosi Prokuradór Jacinto Babo no arguidu hetan asisténsia legal hosi Defensór Públiku José da Silva.
Jornalista : Nelson de Sousa
Editór : Francisco Simões
