DILI, 22 jullu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, simu ona karta husi Estudante Universitáriu ualu ne’ebé hamahan aan iha Aliansa Universitáriu Timor-Leste (AUTL) hodi husu Governu atu oferese mós subsidiu ba estudante iha rai-laran.
“Ha’u haree ona, kontiudu husi karta ne’e hateten governu halo diskriminasaun no injustisa ba estudante sira iha rai laran, maibé ita sei estuda depois mak sei hatan ba ejizensia sira ne’e,”dehan Governante ba Tatoli, iha Palacio do Governo Dili, kuarta ne’e.
Notísia Relevante :Universitáriu Ejize Subsídiu ba Governu
Longuinhos, dehan Governu la halo diskriminasaun hasoru estudante Timoroan iha rai-laran no diaspora, tanba ne’e konsidera deklarasaun estudante AUTL nian laiha baze legal.
Kona-ba dateline ne’ebé maka estudante sira fó ba Governu atu responde asuntu ne’e antes loron 24 fulan-jullu ne’e, Governante husu ba estudante sira atu kalma, no kumpre dever maka kontinua estuda hodi rekupera materia sira ne’ebé maka atraza durante EE.
Entretantu, foinlalais AUTL liuhusi ninia konferénsia imprensa ida iha Dili, ejize Governu atu fó mós subsídiu ba estudante universitariu sira liuhusi aplikasaun propinas livre durante implementasaun Estadu Emerjénsia liga ho moras COVID-19.
Portavóz AUTL, Moises Magno, hateten Governu ninia desizaun ne’e hamosu diskriminasaun hasoru estudante Timoroan iha rai-laran no rai-liur tanba enfrenta situasaun hanesan COVID-19.
Jornalista : Tomé Amado
Editór : Agapito dos Santos
