Universitáriu na’in-30 tuir formasaun lei penál
DILI, 30 jullu 2020 (TATOLI)-Organizasaun la’ós governu nian (ONG) Programa Monitorizasaun Sistema Judisiál (JSMP-sigla Ingles), ohin, iha salaun treinamentu JSMP Manleuana, Dili, kontinua realiza formasaun kona-ba dispozisaun jerál lei kódigu penál ba universitáriu na’in-30 hosi Fakuldade Direitu.
Notísia Relevante : JSMP Kontinua Fó Formasaun Ba Estudante Fakuldade Direitu
Formasaun ne’e hala’o durante loron ida ne’ebé partisipa hosi estudante husi Universidade Dili (UNDIL), Universidade da Paz (UNPAZ) no Universidade Nasional Timor Lorosa’e (UNTL).
Formasaun ne’e ho objetivu atu hasa’e liu tan koñesimentu estudante sira nian. Materia ba formasaun ne’e, formadór sira sei ko’alia kona-ba kódigu prosesu penál foku espesífiku ba prosesu komún no prosesu sumáriu hanesan iha faze inkéritu ka investigasaun, faze julgamentu, faze rekursu no faze ezekusaun ba pena.
Materia seluk mak kódigu penál sei ko’alia kona-ba parte jerál hanesan iha lei penál nia aplikasaun, krime, sirkunstánsia, krime nia konsekuénsia jurídika ho direitu ba keixa.
Iha abertura formasaun ne’e, Defensoria Públika Jerál Câncio Xavier, apresia ho inisiativa di’ak JSMP nian ne’ebé bele fahe esperiénsia ba estudante sira oinsá aumenta sira nia koñesimentu liután.
“Estuda ne’e laiha limite no evolusaun siénsia kontinua la’o hodi obriga ita aprende hasae liu tan pensamentu, tanba ne’e husu imi hotu atu aproveita durante formasaun ne’e ho didi’ak,” hateten Defensór Públiku, Câncio Xavier.
Nia hateten, preparasaun rekursu umanu importante tebes nune’e iha futuru dezenvolve iha sektór justisa, tan ne’e estudante sira preparadu hodi kompete.
Câncio Xavier hateten, papél JSMP importante no kontribui tebes servisu advokasia dezenvolvimentu sektór justisa durante ne’e.
Fatin hanesan Diretora JSMP Ana Paula Marçal, hateten, sei servisu hamutuk ho autór judisiál hanesan juis no Defensor Públiku sira nune’e iha formasaun hanesan sira-nia parte bele fahe mós matenek no esperiénsia liga ba servisu ka lala’ok iha area judisiáriu nian.
Jornalista : Nelson de Sousa
Editór : Francisco Simões
