Violénsia iha arredores nivel akadémiku

DILI, 04 agostu 2020 (TATOLI) – Iha semana hirak, ikus-ikus ne’e, arredores universidade sira, hanesan Universidade Dili (UNDIL), Universidade da Paz (UNPAZ) no Dili Institute of Technology (DIT) hafutar ho violénsia ne’ebé rezulta estudante sira trauma to’o balun kanek no evakua ba halo tratamentu intensivu iha ospitál.

Notísia Relevante :  Polísia kontinua buka autór sona kanek estudante iha UNPAZ

Violénsia iha arredores nivel akadémiku ne’e mai ho suspeitu hotu ne’ebé deskoñesidu, tanba ne’e, difisil tebes atu autoridade seguransa bele halo identifikasaun no halo kapturasaun ba autór ka suspeitu sira. Ho nune’e, portavós Komandu Polísia Nasionál Timor-Leste (PNTL) ,Superintendente Xefe Arnaldo de Araújo, husu ba juventude hotu atu kria paz no hadook-an hosi aktu violentu sira.

“Husu juventude hotu atu mantén paz, nune’e kontribui ba dezenvolvimentu nasaun nian ba oin,” hateten Superintendente Xefe Arnaldo de Araújo, ohin, liuhosi konferénsia imprensa iha Komandu PNTL, Caicoli, Dili.

Nia hateten, atu evita aktu krime ne’ebé kontinua akontese fila-fali ba ema ida-idak nia konsiénsia rasik, tanba ne’e presiza ema hotu nia esforsu oinsá  kria situasaun di’ak iha rai-laran.

Polísia kontinua hala’o nia kna’ar hanesan liuhosi Polisiamentu komunitária hala’o ona sosializasaun iha suku sira, oinsá kria dame nune’e mós asegura seguransa ho hakmatek.

Notísia Relevante : Ema deskoiñesidu sona estudante UNPAZ

Jornalista   : Nelson de Sousa

Editór        : Francisco Simões