Krime koasaun seksuál, taksista Ida hetan pena suspende tinan-rua
DILI, 06 agostu 2020 (TATOLI)- Taksista na’in-ida ho inisiál ZAB tenke simu pena prizaun tinan-rua no suspende ba tinan-rua tanba komete krime koasaun seksuál hasoru lezada ECD.
Liuhusi audiénsia julgamentu, ohin, iha Tribunál Distritál Dili (TDD) Juiza Julmira Auxiladora hateten, desizaun Tribunal nian ne’e bazea ba promosaun prova liuhusi deklarasaun arguidu no lezada iha julgamentu hirak konjuga ho aktu ne’ebé aprezenta husi Ministériu Públiku (MP) nia ho entendimentu Tribunál nian prienxe duni elementu krime ne’ebé arguidu komete.
Nia hateten, faktu ne’ebé prova mak iha loron 3 fevereiru 2014, lezada ECD hein hela karreta besik iha edifísiu Ministériu Justisa nia oin, atu fila ba nia-uma ihs Bebonuk no arguidu ZAB nu’udar kondutór taxi ida lori nia taxi ba para iha lezada nia oin atu tula lezada.
Bainhira tula tiha lezada arguidu liuhusi Pantai-Kelapa, maibé arguidu la lori lezada ba nia-uma no arguidu tama fali iha dalan Timor Plaza nia kotuk, iha Hudi-laran arguidu haree ba mai ema la iha ho nune’e para karreta iha fatin refere. Nune’e arguidu ka’er lezada nia liman hodi tau ba arguidu nia kalsa hodi dehan ba lezada katak nia gosta lezada, no husu atu halo relasaun maibé lezada rekuza.
Arguidu kontinua tula lezada lori ba iha tasi-ibun Tasi Tolu nian, lezada ta’uk atu halai, maibé arguidu ameasa ho tudik ida atu oho, nune’e momentu ne’ebá iha mane ida hamriik hela lezada husu ajuda loke odamatan hodi ba keixa iha polísia.
Arguidu hakarak halo aktu relevu ida ne’e, hodi satisfás nia vontade seksuál hodi kontra vontade husi lezada. Arguidu hanesan autór material ba forma konsumada ho krime koasaun seksuál previstu iha artigu 171 Kódigu Penál Timor-Leste, ne’ebé hateten, se maka obriga ema seluk sofre ka prátika ho nia ka ho ema seluk, aktu seksuál relevante, ho violénsia, ameasa grave, ka ba fim ida ne’e, halo uluk tiha ema ne’e lakon konsiénsia ka labele reziste, sei hetan pena prizaun tinan-rua (2) to’o tinan-ualu (8).
Tuir Tribunál nia haree ba sirkunstánsia hotu no kondisaun arguidu nian hanesan taksista ida iha família no oan, nune’e Tribunál deside aplika pena prizaun tinan-rua (2) no suspende ba tinan-rua (2) signifika durante tinan-rua arguidu labele komete tan kazu seluk, kuandu komete mak sei hetan pena prizaun efetivu.
Julgamentu ne’e Ministériu Públiku (MP) reprezenta husi Prokuradór Jacinto Babo, arguidu hetan asisténsia legal husi Advogadu Privadu Tomázia Umbelina.
Jornalista : Nelson de Sousa
Editór : Francisco Simões
