MJ ho Embaixada EUA ko’alia atu halo alterasaun ba kontratu arrendamentu
DILI, 13 agostu 2020 (TATOLI)-Ministru Justisa (MJ), Manuel Cárceres da Costa, ohin, simu audiénsia ho Embaixadóra Estadus Unidus Amerika iha Timor-Leste (EUA), Katlhen Fitzpatrick, hodi ko’alia kona-ba atu halo alterasaun ba kontratu arrendamentu ne’ebé antes ne’e estabelese.
Ministru Justisa, Manuel Cárceres da Costa, informa, Governu liuhusi Ministériu Justisa, estabelese ona kontratu arrendamentu ho Embaixada EUA ba utilizasaun uma Estadu iha Praia Coqueiros, Dili, to’o ba tinan 2032.
Manuel Cárceres hateten, iha ona faze negosiasaun ba kontratu arrendamentu ne’ebé antes ne’e estabelese atu halo alterasaun fila-fali ho intensaun ida katak Estadu Timor-Leste ajuda Embaixada EUA iha Dili hodi fasilita uma Estadu entaun EUA mós oinsá atu ajuda mós fatin ba embaixada Timor-Leste nian iha Washington.
“Durante ne’e Governu fasilita fatin ba Embaixada EUA iha Dili tanba sira mós iha intensaun ona iha ne’e ita ezije katak sira uza uma Estadu halo kontratu arrendamentu se bele mós Estadus Unidus Amerika buka mós fatin ba Timor-Leste nia fatin iha Washington,” hateten Ministru Manuel Cárceres ba Agência Tatoli, hafoin sorumutuk iha nia kna’ar fatin Caicoli, Dili.
Governante ne’e dehan, liuhusi negosiasaun ne’ebé iha daudaun ne’e EUA indika ka disponibiliza ona uma ida ne’ebé sei fasilita Timor-Leste nia embaixada hodi bele uza iha Washington.
Ba oin Embaixada EUA iha Timor-Leste sei haruka karta ida ba iha MNE, nune’e mós situasaun COVID-19 para ekipa tékniku hosi Ministériu Negósiu Estranjeiru (MNE) ho Ministériu Justisa liuhusi Terras no Propriedade sei ba iha Washington hodi bele haree direita kondisaun uma refere.
“Hafoin haree hotu mak ita sei halo re-negosiasaun kontratu arrendamentu no hodi haree ona termu tékniku alterasaun arrendamentu,” esplika Ministru Manuel Cárceres
Ministru Manuel Cárceres hateten, alterasaun kontratu arrendamentu ne’e bele sei redús kustu selu ne’ebé durante ne’e aplika ona ba embaixada EUA iha Timor-Leste utiliza uma Estadu iha Dili tanba depende ba utilizasaun fatin, maibé ekipa sira sei ba haree uluk uma ne’ebé EUA fó hafoin bele define.
“Kona-ba arrendamentu ne’ebé durante ne’e ita hala’o ho Embaixada EUA, ha’u ladún lembra kontratu selu kada fulan ka tinan ida hira, maibé durante ne’e sira-nia parte selu di’ak tebes,” nia tenik.
Tuir lei ba alterasaun kontratu arrendamentu Timor-Leste ho EUA bele halo to’o tinan 100.
Jornalista : Nelson de Sousa
Editór : Francisco Simões
