DILI, 13 agostu 2020 (TATOLI)–Primeiru-Ministru (PM), Taur Matan Ruak, orienta Ministériu Turizmu, Komérsiu no Indústria (MTKI) atu dezenvolve Lagoa Maubara iha Munisípiu Liquiçá no Lagoa Eraulo iha Munisípiu Ermera sai fatin turíztiku.
Xefe Governu hato’o asuntu ne’e, bainhira hala’o enkontru ho Ministru Turizmu Komérsiu no Industria, José Lucas do Carmo Silva, kuarta (12/08) ne’e iha Palasiu Governu.
Tuir nota ofisiál ne’ebé Agência Tatoli asesu kuarta ne’e relata, iha tempu okupasaun Indonézia, Lagoa Maubara sai ona hanesan fatin destinasaun turíztika lokál maibé hafoin Timor-Leste ukun-an fatin ne’e sai abandonadu.
Tanba ne’e, Xefe Ezekutivu hakarak dezenvolve falifali fatin turizmu ne’e hodi halo kombinasaun hamutuk ba turizmu tradisionál, istorikál, kulturál no ekolojikál.
PM Taur sujere iha Lagoa Maubara atu harii mós réplika uma-lisan ne’ebé reprezenta munisípiu 12 inklui Rejiaun Administrativa Espesiál Oé-cusse Ambeno (RAEOA), nu’udar identidade kulturál atubele atrai turizta sira ba vizita sítiu Lagoa Maubara.
Aleinde ne’e, Xefe Governu mós propoin atu halo jestaun ba lafaek iha lagoa ne’e, tanba daudaun ne’e lafaek barak fuik no abandona iha tasi no mota sira ne’ebé dala barak hakanek no oho komunidade sira, tanba ne’e presiza rekolla lafaek sira hodi tau iha lagoa no jere hosi ema profisionál hodi bele atrai vizitante sira ba haree.
“Hein katak bainhira fatin ne’e dezenvolve no iha jestaun di’ak, sei hatama reseita ba Estadu no mós bele hasa’e ekonomia komunidade sira ne’ebé hela besik,” dehan PM Taur.
Aleinde ne’e, eis Prezidente Repúblika ne’e, mós orienta atu dezenvolve Lagoa Eraulo iha Munisípiu Ermera, hanesan fatin hakiak ikan nune’e ba futuru mai bele sai hanesan fatin atrasaun ba hakail ikan.
Nia nota katak, lagoa ne’e furak maibé abandonadu, entaun presiza hadi’a no halo jestaun di’ak.
Xefe Governu iha esperansa katak ho mandatu hela tinan rua resin ne’e, governante sira tenke halo esforsu másimu hodi dezenvolve fatin turíztiku hirak ne’e no daudaun hanesan momentu oportunu atu avansa iha setór turizmu hanesan únika fonte iha futuru ne’ebé bele troka petróleu hodi hatama reseita ba Estadu.
“Fatin rua ne’e iha ona konseitu ba dezeñu ne’ebé prepara hosi asesór tékniku Primeiru-Ministru nian no hein MTKI bele atualiza liután iha estudu viabilidade hodi hatama ba planu orsamentu tuirmai,” refera nota imprensa.
Iha sorin seluk, Ministru José Lucas , simu orientasaun ne’e ho resposta pozitivu no kompromete katak sei tau ba programa prioridade.
“Ne’e tama ona iha planu MTKI nian, ba planu reabilitasaun ba fatin turíztiku sira hanesan Cristo Rei, Bee Manas Marobo no seluk tan, inklui ministériu ne’e mós halo hela konseitu turizmu komunitáriu nian atu suporta inisiativa lokál iha turizmu komunitária,” governante ne’e subliña.
Jornalista: Antónia Gusmão
Editora: Julia Chatarina
