SFJJ sei rekruta formadór nasionál
DILI, 17 agostu 2020 (TATOLI)-Iha proposta orsamentu jerál Estadu (OJE) tinan 2021, Sentru Formasaun Jurídika Judisiál (CFJJ-sigla portugés) tau ona planu prioridade atu rekruta formadór nasionál besik na’in-10.
Notísia Relevante : Setembru, CFJJ hahú formasaun komplementár ba autór judisiál
Diretór SFJJ, Antonino Gonçalves, hateten, daudaun ne’e sentru Formasaun Jurídika Judisiál seidauk iha formadór nasionál no iha de’it formadór internasionál ne’ebé durante ne’e fó formasaun ba autór judisiáriu sira.
Nia hateten, durante ne’e SFJJ halo kontratasaun ho formadór internasionál sira husi Portugal ho númeru boot no nia kustu orsamentu mós boot tebes, tanba ne’e, atu redús kustu maka sei loke vaga hodi selesiona Timoroan ne’ebé iha esperiénsia iha area espesializada hodi bele konkorre.
“Tinan oin, ami iha ona planu depende nesesidade sei rekruta formadór nasionál ema na’in-10 nune’e hamutuk ho formadór internasionál sira,” hateten Diretór SFJJ, Antonino Gonçalves ba Agência Tatoli, ohin, iha Dili.
Ba kandidatu ne’ebé selesionadu maka sei tuir uluk formasaun tékniku durante fulan-ida hafoin sai asistente formadór ne’ebé sei akompaña husi formadór internasionál sira no iha ona progresu bele ona sai formadór loos.
Formadór sira bele hanorin kobre matéria sira ba lian portugés, kódigu prosesu penal, kódigu prosesu sivíl, direitu konstitusionál no sira seluk tan.
Jornalista : Nelson de Sousa
Editór : Francisco Simões
