Arguidu JA ba hatán Tribunal tanba kondús motor laiha karta kondusaun
DILI, 26 agostu 2020 (TATOLI)-Tribunál Distritál Dili (TDD), ohin, iha prosesu sumáriu kontinua hala’o julgamentu ba arguidu ho inisiál JA, tanba kondús motor laiha karta kondusaun.
Tuir faktu ne’ebé arrola husi Ministériu Públiku (MP) katak, iha loron 23 agostu 2020, iha tuku 23:00 Otl, iha area Delta 01, Comoro, Dili, Polísia Unidade Seksaun Tránzitu sira hala’o pasa revista ba motor no karreta, nune’e momentu ne’ebá konsege identifika arguidu JA laiha dokumentu legalizadu, kona-ba karta kondusaun.
MP akuza arguidu ho krime laiha karta kondusaun ne’ebé previstu iha artigu 207 iha kódigu penál Timor-Leste ne’ebé hateten, ema ne’ebé uza veíkulu motorizada laiha lisensa ne’ebé lei ezije sei hetan pena prizaun to’o tinan-rua (2) ka multa.
Hatán ba akuzasaun husi MP nian, arguidu JA konfesa ho parsialmente katak akuzasaun hirak ne’e loos hotu no arrepende ho aktu ne’ebé nia parte halo.
Hafoin rona tiha deklarasaun arguidu nian tama kedas ba alegasaun Ministériu Públiku, liuhusi prokuradór titular, Jacinto Babo, katak laiha duvida ba faktu sira nune’e solisita ba Tribunál atu aplika multa ba arguidu.
Defeza, Humberto Pereira, ne’ebé fó asisténsia ba arguidu aseita mós ho rekerimentu MP nian husu atu aplika mós multa. Nune’e, Tribunál liuhusi Juiza Edita Palmira omóloga kedas, haree ba deklarasaun arguidu no faktu sira provadu nune’e aplika de’it pena multa ba Estadu U$60.00 kada loron arguidu selu $1.00 durante loron 60 nia laran no absolve hosi taxa judisiáriu.
Tuir lei kuandu arguidu la kumpre desizaun Tribunál durante loron 60 nia laran, maka arguidu sei kumpre pena prizaun efetivu loron 20.
Jornalista : Nelson de Sousa
Editór : Francisco Simões
