Janeiru-jullu, DNRN emite pasaporte 7.754
DILI, 26 agostu 2020 (TATOLI)—Diresaun Nasional Rejistu Notariadu (DNRN), Ministériu Justisa, ejerse nia servisu hodi kontinua fó atendimentu ba públiku ne’ebé hatama pedidu atu hetan pasaporte RDTL.
Notísia Relevante : Atendimentu emisaun pasaporte ba munisípiu hitu seidauk bele hahú
“Husi fulan janeiru mai to’o jullu 2020, aplikante ne’ebé mai halo emisaun pasaporte foun no renovasaun ba pasaporte komún, servisu no diplomátiku hamutuk ema na’in-7.754, ” informa Diretór DNRN, Victor da Costa Neto, ohin, ba Agência Tatoli iha nia servisu fatin, Colmera, Dili.
Husi númeru ne’e, DNRN konsege rekolla reseita hamutuk $475,400.00 hodi hatama ba kofre Estadu ne’ebé kobre mai servisu notariadu Munisípiu Dili, Bobonaro, Rejiaun Administrativu Espesiál Oe-Cusse Ambeno (RAEOA), Manatuto, Baucau no Lautem.
Iha tinan 2019, DNRN konsege rekolla mós reseita milaun $1,794,775.00 ba kofre Estadu ne’ebé emite pasaporte ba aplikante hamutuk 28.532, kompostu husi aplikante pasaporte komún 27058, pasaporte servisu 1212, pasaporte diplomátika 254 no pasaporte estranjeiru ualu (8).
Notísia Relevante : DNRN Rekolla Reseita $403,275.00
Jornalista : Nelson de Sousa
Editór : Francisco Simões
