DILI, 25 setembru 2020 (TATOLI)-Camões I.P. no Uniaun Europeia, ne’ebé reprezenta husi Embaixada Portugal iha Timor-Leste no Xefe Kooperasaun Uniaun Europeia nian, ohin, fó apoiu livru jurídiku sira ba Prokuradoria Jerál Repúblika (PGR).
Serimónia ne’e hala’o iha edifísiu Prokuradoria Jerál Repúblika iha Colmera, Díli, iha ámbitu projetu “OSAN POVU NIAN, JERE HO DI’AK“ Parseria ba Melloria ba Prestasaun Servisu sira liuhosi Haforsa Jestaun no Supervizaun Finansas Públikas nian iha Timor-Leste” (PFMO-Komponente 2), projetu ida ne’ebé ho ko-finansiamentu husi Uniaun Europeia no ko-finansiamentu ho jestaun husi Camões, I.P.
“Oferta ida ne’e atu disponibiliza ezemplár livru sira balun husi nesesidade dahuluk ba Prokuradór sira hotu husi Ministériu Públiku, relasiona ho sira-nia knar nu’udar majistradu,” haktuir nota komunikadu ne’ebé, Agência Tatoli asesu.
Oferta ne’ebé disponibiliza ezemplár livru sira balun hosi nesesidade dahuluk ba Prokuradór ne’ebé inklui ezemplár 40 sira hosi konstituisaun anotada Timor-Leste, ezemplár 40 sira hosi kódigu sivíl Timor-Leste, hanesan mós ezemplár 35 sira hosi disionáriu portugés-tétum-portugés.
Oferta livru sira konstituisaun anotada Timor-Leste rezulta husi oferta ne’ebé fó husi sentru Direitu umanu universidade Minho, ho ko-finansiamentu husi Camões, I.P.
Serimónia oferta livru ne’e partisipa hosi Prokuradór Jerál Repúblika, José da Costa Ximenes, Embaixadór Portugal iha Timor-Leste, José Pedro Machado Vieira, Xefe Kooperasaun Uniaun Europeia nian, ne’ebé reprezenta Embaixadór Uniaun Europeia iha Timor-Leste, Ramon Reigada, Koordenador Adjuntu projetu OSAN POVU NIAN, JERE HO DI’AK, Horácio Henriques no konvidadu sira seluk.
Jornalista : Nelson de Sousa
Editór : Francisco Simões
