BAUCAU, 16 dezembru 2020 (TATOLI)—Prezidente Repúblika, Francisco Guterres Lú Olo, hateten edukasaun ne’ebé di’ak mak bele liberta oan sira iha futuru, tanba ne’e Governu no órgaun Estadu kaer metin atu aposta hela nafatin kona-ba oan sira-nia edukasaun.
Notísia Relevante: PR Lú Olo presta omenajén ba saudozu Komisáriu Polítiku Sahe
“Só ita-nia oan sira-nia edukasaun di’ak, mak ita bele liberta ita-nia oan sira ba aban bainrua nian. Só ita-nia oan sira-nia edukasaun di’ak mak aban bainrua ita-nia Estadu no ita-nia rai ne’e bele buras liután no bele di’ak liután ba sira-nia moris aban bainrua nian. Se ita la matenek, ita labele halo buat ida, tanba ne’e imi tenke eskola. Imi aprende hosi imi-nia profesór-profesora sira, ne’ebé transmite valór no siénsia hanorin ba imi atu hatene di’ak liután,” PR Lú Olo hateten bainhira hala’o vizita ba Eskola Sekundáriu Jerál númeru 01 Tirilolo, Baucau, kuarta ne’e.
PR hatutan, kondisaun ne’e de’it mós la to’o maibé presiza mós kondisaun eskola nian no presiza fatin, kadeira, no aula ne’ebé sifisiente, atu nune’e estudante sira tuur ho avontade iha aula laran labele alunu barak liu, atu nune’e estudante sira aprende no simu lisaun ho di’ak liután.
“Foin diretór dehan estudante 50-60 iha sala ida, ha’u hanoin ida-ne’e ladún di’ak. Ha’u hatete kedas kondisaun ladún di’ak entaun oinsá mak Estadu kria kondisaun ne’ebé mak di’ak para labarik sira tuur iha sala nune’e avontade aprende di’ak liután,” PR Lú Olo hateten.
Tuir Prezidente Repúblika, presiza mós kondisaun profesór no profesora sira hanesan meza, armari no materiál sira seluk para hanorin labarik sira. Se laiha kondisaun oinsá mak bele hanorin di’ak, tanba bainhira kondisaun eskola di’ak ona, sala iha ona, entaun presiza mós bee no sanitasaun.
Iha biban ne’e, Prezidente Repúblika hato’o nia sentimentu ksolok tanba ohin bele hasoru malu ho oan no inan-aman sira hotu hodi rona direta kondisaun Eskola Sekundáriu Jerál Númeru 01 Tirilolo Baucau nian.
“Ha’u hakarak hatoo ba ita-boot sira hotu katak Timor-Leste liuhusi dalan naruk tebes para atu lori prosesu ida-ne’e to’o mai ita ukun rasik-aan. Oan sira ne’ebé mak barak iha ne’e, imi seidauk moris. Maibé jerasaun inan-aman sira-nian no avó sira-nia liuhusi dalan ida terus nian no mate nia mak ohin loron ita ukun rasik aan,” Lú Olo hateten.
PR Lú Olo haktuir, pontu prinsipál inan-aman no avo sira-nia tempu uluk depende to’o mate mak povu Timor-Leste sai matenek no tenke matenek atu kaer tutan ukun rasik aan ne’e ba oin.
Jornalista: Osória Marques
Editór: Cancio Ximenes
