DILI, 01 fevreiru 2021 (TATOLI) – Sekretáriu Estadu Juventude no Desportu (SEJD) Abrão Saldanha, informa Governu liuhosi SEJD iha tinan ne’e seidauk tau importánsia ba hadi’a kondisaun Liga Futeból Timor-Leste (LFTL).
“Infelizmente, ita seidauk iha planu konkretu ba hadi’a kondisaun LFTL nian, maibé ba oin, ami sei tau duni importánsia ba kondisaun liga nian,” Abrão Saldanha informa ba Agência TATOLI iha edifísiu SEJD, Lecidere, Dili, segunda ne’e.
Nia dehan, liga hanesan órgaun independente ida hosi Governu. Tanba ne’e Governu sei la abandona no sei tau atensaun ba kondisaun hodi funsionáriu sira halo servisu no seluk tan.
LFTL nu’udar órgaun liga ne’ebé transforma hosi Liga Futeból Amadora (LFA) ne’ebé estabelese iha 2015 hosi VI Governu Konstitusionál no hala’o ona liga ba dala haat.
Daudaun ne’e edifísiu LFTL iha Bairro Formosa, Dili, ne’ebé okupa de’it Salaun Xanana Sport Centre nia varanda nune’e funsionáriu sira bele halo servisu loron-loron nian.
Jornalista : Hortencio Sanchez
Editór : Francisco Simões
