DILI, 10 fevereiru 2021 (TATOLI)-Komandu Jerál Polísia Nasionál Timor-Leste (PNTL) presta omenajen ba Saudozu Cristovão Bare Mali “Loriku Matebian” ne’ebé hakotu iis iha loron 08 janeiru 2021.
Matebian hakotu iis iha tuku 12:00 Otl, iha Ospitál Nasionál Guido Valadares (HNGV), tanba sofre kankru fuan ho diabetes.
Moras ne’e ataka matebian iha uma no família sira evakua ba HNGV hodi hala’o tratamentu durante loron tolu, maibé esforsu hotu ne’ebé família ho médiku halo la konsege salva vida.
Komandante Jerál PNTL, Komisáriu Faustino da Costa, kuarta ne’e, liuhosi despaxu númeru 144/CG-PNTL/II/2021 dekretu lei númeru 16/2009, de 18 Marsu, promove matebian hosi diviza Primeiru Sarjentu ba Sarjentu Xefe tuir Rejime Promosaun (RP).
Saudozu moris iha Aldeia Sagrada Familia, Suku Bidau Santana, Postu Administrativu Cristo Rei, Munisípiu Dili, iha loron 05 outubru 1972, nu’udar oan daruak hosi Francisco Maubere (aman) no inan Marta Soares “Miakai”.
Saudozu iha maun ida ne’ebé mate ona no hela nia mesak. Saudozu hosik hela feen na’in-tolu ho oan na’in-ualu.
Saudozu hahú tama PNTL iha 07 abríl 2006 ho klase 61 iha akademia PNTL no kursu remata iha 22 juñu, hahú servisu iha Eskuadra Kristu Rei, Munisípiu Dili iha 2006 to’o 2008 muda ba Eskuadra Don Aleixo. Iha tinan 2010 hala’o mós servisu iha Eskuadra Metinaro to’o 2011 ba fali Kristu Rei.
Iha tinan 2018, Saudozu simu medalla Komportamentu Exemplár hosi Komandu Jerál Polísia Nasional Timor-Leste.
Partisipasaun iha luta
Iha tinan 1989, saudozu envolve aan iha Organizasaun Rezisténsia Klandestina ho responsavel maka Domingos Fatima Pereira. Iha 1991, saudozu envolve aan iha manifestasaun 12 Novembru no sai hanesan sobrevivente Masakre Santa Krús no hetan kapturasaun hosi militár Indonézia, maibé dezvia hosi militár nia emboskada.
Depois Masakre Santa Krús, saudozu kontinua ativu iha rede klandestina ligasaun Frente Armada Rejiaun Tres (III), no Rejiaun kuatru (IV) iha tinan 1999.
Ho partisipasaun luta ne’e, iha tinan 2008, saudozu hetan kondekorasaun Orden Loriku Asuwa’in ho medalla Grau Tres ho Moldura tempu dedikasaun luta oitu a catorze (8 a 14).
Matebian nian oan mane boot, Raimundo Borges da Costa Koli Pereira husu ba Komité 12 Novembru 1991, no Komandu PNTL atu kontinua tau matan ba família oan-kiak sira.
Iha parte seluk, Segundu Komandante Polísia Munisípiu Dili, Euclides Belo, dehan PNTL Dili lakon membru di’ak ida ne’ebé dixiplina hodi kumpre orden no hala’o servisu ho responsabilidade too hakotu nia peregrinasaun ikus.
Komandu Polísia Dili aprezenta ba Komandu Jerál PNTL hodi tau konsiderasaun haree ba saudozu nia direitu tuir lei seguransa sosiál.
Molok hala’o serimónia funerál, família boot Komandu PNTL Dili no membru Komité 12 Novembru, lori matebian ba vizita uluk Komandu PNTL Dili no kontinua ba Komité 12 Novembru, Balide, Dili, hodi presta omenajen ikus no kontinua misa iha Igreja Becora.
Serimónia funerál iha Semitériu Becusi, Dili, hala’o ho parade militár partisipa direita hosi Komandu Jerál PNTL Dili no Komandu F-FDTL, konvidadu no família sira.
Jornalista : Eugénio Pereira
Editór : Francisco Simões
