SEPS husu komunidade organiza malu hamoos lixu
DILI, 01 marsu 2021 (TATOLI)-Sekretáriu Estadu Protesaun Sivíl (SEPS), Joaquim Gusmão, husu ba komunidade hotu atu organiza malu hamoos lixu iha baleta sira ne’ebé besik iha ida-idak nia hela fatin, nune’e bele kontribui prevene inundasaun iha tempu udan.
“Hakarak hameno ba komunidade sira, atu organiza malu ho xefe suku no xefe aldeia sira hamoos baleta sira iha Dili laran hodi evita inundasaun iha tempu udan,” Joaquim Gusmão hateten ba jornalista iha edifísiu Ministériu Interiór, Vila Verde, Dili, segunda ne’e.
Nia dehan, buat ne’ebé observa iha kapitál Dili bainhira udan akontese inundasaun fo’er hanesan ákua no lixu sira seluk nakonu sai. Tanba ne’e, partisipasaun voluntarizmu komunidade sira-nian importante tebes atu hamoos valeta no hamoos uma-ninin.
Jornalista : Nelson de Sousa
Editór : Francisco Simões
