DILI, 09 abríl 2021 (TATOLI)-Ministériu Administrasaun Estatál (MAE), sesta ne’e, lidera reuniaun Unidade ba Misaun Protesaun Sivíl no Jestaun Dezastre Natural.
Notísia Relevante : Governu presiza millaun $200 responde dezastre naturál
Liña ministériu ne’ebé hola parte iha unidade ne’e mak hanesan MAE, Ministériu Solidariedade Sosiál no Inkluzaun (MSSI), Ministériu Interiór (MI), Ministériu ba Asuntu Parlamentár no Komunikasaun Sosiál (MAPCOMS), Sekretária Estadu Protesaun Sivíl (SEPS), Polísia Nasionál Nasionál Timor-Leste (PNTL) ho sira seluk tan.
Enkontru dahuluk Unidade ba Misaun Protesaun Sivíl no Jestaun Dezastre Naturál ne’ebé hala’o iha edifísiu MAE ne’e halo diskusaun ba pontu importante tolu, hanesan;
- Ko’alia kona-ba koordenasaun interministeriál relasiona ho intervensaun ne’ebé entidade governamentál, sosiedade sivíl halo ona ba fatin refujiadu ka fatin evakuasaun abitante sira.
- Diskute mós dadus kona-ba estragu, vítima lakon vida durante akontese iha dezastre naturál.
- Ko’alia kona-ba servisu ne’ebé Governu tenke halo levantamentu dadus estragu afeta ba família afetadu, hodi nune’e, bele sai informasaun ba Governu bele halo intervensaun ba vítima sira ne’ebé mak afetadu hosi dezastre natural.
Ministru MAE, Miguel Perreira de Carvalho, ba jornalista esplika Governu sei identifika ho forma rua ba família afetadu bele fila-fali ba sira hela fatin hodi hadi’a uma ne’ebé estragu no komunidade balun labele fila-fali tanba pratikamente uma rai monu hanehan ona no mota lori nune’e labele fila.
Nia dehan, daudaun SEPS hamutuk ho Prezidente Autoridade no lider komunitáriu sira rekolla hela levantamentu dadus espera iha semana oin dadus sira bele hetan ona serteza.
Ministru Miguel Perreira de Carvalho, dehan númeru vítima dezlokadu besik ena 13,000 iha sentru evakuasaun sira iha Dili no territóriu ho hirak ne’e liuhosi Governu halo intervensaun apoiu hahán.
Governu propoin medida sira hodi fó atendimentu ba vítima sira ne’ebé hela fatin estragu no orsamentu seidauk halo estimativa tanba sei hein dadus. Tanba ne’e, ministériu hotu-hotu partisipa ativu iha tempu dezastre naturál ne’e liu-liu Protesaun Sivíl, MSSI, MAE no autoridade lokál ho komunitária hodi hala’o servisu.
Jornalista : Nelson de Sousa
Editór : Francisco Simões
