DILI, 12 abríl 2021 (TATOLI)-Korpu Bombeiru koordena ho Bee Timor-Leste, Empreza Públiku (BTL,E.P) kontinua fornese bee-moos ba komunidade afetadu dezastre naturál iha kapitál Dili.
Notísia Relevante : BTL,E.P garante fornese hikas bee-moos ba komunidade Bekusi
“Kuaze komunidade iha Dili laran la asesu ba bee-moos tanba kanalizasaun bee paralizadu hotu ne’ebé afeta hosi dezastre naturál, nune’e ami nia prioridade primeiru mak servisu hamutuk ho BTL,E.P fasilita fornesimentu bee-moos ba abitante sira,’’ Diretór Nasionál Bombeiru, Cláudio da Silva, hateten ba Agência Tatoli iha Dili, segunda ne’e.
Bombeiru halo atendimentu ne’e hahú inundasaun to’o daudaun ne’ebé tuir pedidu komunidade nian iha kapitál Dili hanesan iha Cristo Rei, Manleuana, Delta, Comoro, Bidau no seluk.
“Ami iha karreta neen para enxe bee loro-loron hodi fornese ba komunidade sira iha situasaun ne’e,’’ Cláudio da Silva hateten.
Sei rega rai-rahun
Diretór Nasionál Bombeiru, Cláudio da Silva, informa mós katak korpu Bombeiru sei regra rai-rahun ne’ebé kontinua maka’as iha estrada públiku balun iha kapitál Dili hafoin dezastre naturál, domingu (04/04).
“Bainhira udan la tau ona, ami sei regra ra- rahun iha fatin estrada públiku sira,’’ Cláudio da Silva hateten.
Inundasaun ne’ebé akontese iha loron 04 abríl rezulta mós lixu no tahu-dodook invade iha sidade Dili. Iha loron hirak ne’e tahu-dodok sira ne’e nakfilak hodi hamosu rai-rahun maka’as iha estrada públiku, liuliu iha área Aitarak Laran no fatin seluk tan.
Antes ne’e mós Sekretária Estadu Juventude no Desportu hamutuk ho Posku Asaun Juventude organiza juventude sira hosi Organizasaun Arte Marsiál ho arte rituál hodi ajuda komunidade hamoos fo’er iha Dili laran.
Jornalista : Nelson de Sousa
Editór : Francisco Simões
