iklan

NASIONÁL, HEADLINE

Embaixadór EUA introdús kooperasaun militár ba Lere

Embaixadór EUA introdús kooperasaun militár ba Lere

Embaixadór EUA iha TL, Blakstone, hala’o enkontru ho Xefe Estadu Maiór Jenerál F-FDTL, Tenente Jenerál, Lere Anan Timur. Imajen/média F-FDTL.

DILI, 16 abríl 2021 (TATOLI)—Embaixadór Estadu Unidu Amérika (EUA) iha Timor-Leste (TL) Charles Kevin Blackstone, introdús programa kooperasaun serbisu iha área militár ba Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál, Lere Anan Timur.

“Ha’u ho Jenerál Lere, ko’alia área lubuk ida kona-bá kolaborasaun EUA ho F-FDTL iha área militár-nian, diskute mós prosesu asisténsia ne’ebé fó ba TL hodi reabilita Aeroportu Baucau,” Embaixadór Blackstone hateten ba jornalista-sira iha Kuartél Jenerál F-FDTL, Fatuhada, Dili, sesta ne’e.

Notísia relevante:Komunidade agradese apoiu umanitária hosi povu EUA

Embaixadór Blackstone hatutan, EUA prontu kolabora nafatin ho Komandu F-FDTL hodi realiza programa treinamentu hamutuk hodi kontribui ba dezenvolvimentu F-FDTL.

Maski mundu inklui Timor-Leste sofre hela ba surtu COVID-19, maibé kooperasaun serbisu kontinua implementa, importante mak kumpre nafatin regra Organizasaun Mundial Saúde (OMS).

“Maski ita iha hela situasaun COVID-19, maibé ofisiál F-FDTL na’in-hitu no ofisiál Governu balun sei ba EUA kada tinan,” nia hateten.

Iha fatin hanesan, Xefe Estadu Maiór Jenerál F-FDTL, Tenente Jenerál, Lere Anan Timur  agradese ba apoia EUA ne’ebé kontinua hakarak tulun dezenvolvimentu rekursu umanu F-FDTL di’ak liu-tán.

“Ami diskute kooperasaun tékniku militár kona-bá ezersísiu rua ne’ebé hala’o tinan-tinan. Ida mak ezersísiu ‘Harii Hamutuk’ ho karáter apoiu umanitáriu no ezersísiu ‘Dalan ba Dame’ nu’udár kooperasaun militár no prosesu konstrusaun Aeroportu Baucau bele halo ona,” Lere hateten.

Tuir loloos, nia hatutan, konstrusaun Aeroportu Baucau ne’e implementa ona iha 2020, maibé tanba negosiasaun polítika lori tempu, hodi adia konstrusaun ba tinan 2021.

Lere agradese, tanba tinan ne’e sei implementa ezersísiu ‘Harii Hamutuk’ hodi hasa’e volume serbisu atu apoia povu TL ne’ebé sofre inundasaun ne’ebé akontese iha loron 4 abríl.

F-FDTL no Militár EUA sei tun ba terrenu hodi ajuda povu, ajuda harii eskola ne’ebé anin boot no mota sobu, hodi konstrui fila-fali nu’udár kontribuisaun ba dezenvolvimentu iha TL.

Tuir planu, iha implementasaun hadi’a infraestrutura ne’ebé aat, Komandu F-FDTL sei koordena mós ho Militár Austrália, Nova Zelándia, Portugál no Japaun atu bele ajuda.

Jornalista: Eugénio Pereira

Editór: Cipriano Colo

iklan
iklan

Leave a Reply

iklan
error: Content is protected !!