DILI, 19 abríl 2021 (TATOLI)-Responsavel sentru evakuasaun iha Eskola Sekundária Jerál 04 Setembru UNAMET, Balide, Dili, Francisca da Silva, husu ba Governu atu apoiu ai-han ho ropa ba vítima dezastre naturál ne’ebé daudaun ne’e evakua iha eskola 04 Setembru UNAMET-Dili.
Notísia Relevante : Vítima dezastre naturál uma-kain 70 iha INFORDEPE
“Husu ba Governu tau matan ita-nia vítima uma-kain 60 ne’ebé daudaun ne’e evakua mai iha Eskola 4 Setembru UNAMET, tanba sira presiza tebes mak ai-han no liuliu mós ropa,” Francisca da Silva haktuir ba Agência Tatoli iha Sentru Evakuasaun Eskola Sekundária Jerál 04 setembru UNAMET, segunda ne’e.
Nia hateten momentu inundasaun iha kapitál Dili, 04 abríl liubá, abitante-sira ne’e halai ho ropa isin lolon de’it no to’o agora hosi parte Governu, ONG nasionál ka internasionál-sira seidauk ajuda ropa ba vítima-sira.
Nia dehan, Governu presiza tebes fó apoiu ropa no ai-han ba vítima sira tanba vítima sira ne’ebé daudaun iha Eskola 04 Setembru UNAMET, Balide, Dili, arraska loos ba ropa atu troka.
Kona-ba hahán, nia tenik, bainhira sira sei hela iha sentru evakuasaun Sekretáriu Estadu Protesaun Sivíl (SEPS), Caicoli, Dili, parte Ministériu Solidariedade Sosiál no Inkluzaun (MSSI) no hosi igreja ho kompañia balun oferese hahán tasak, maibé hahú hosi loron 07 abríl, muda sira ba fali Eskola 04 Setembru UNAMET, Balide, Dili, arraska ona ba ai-han.
“Bainhira Ministériu Administrasaun Estatál lori ami mai fali Eskola UNAMET ne’e, MAE fó foos saka lima, entaun ami fahe uitoan ba malu hodi konsumu, no daudaun ne’e Embaixada Estadu Unidu Amérika iha Timor-Leste, Ministériu Edukasaun hamutuk ho Embaixada Portugal no UNICEF apoiu tan ami hanesan fó sanan, taxu, inklui kolxaun ba labarik sira toba. Maibé ropa arraska tebes,” nia hateten.
Apoiu ne’ebé daudaun ne’e sira hetan, tuir nia, seidauk sufisiente ba vítima-sira tanba iha vítima balu família barak susar tebes bainhira hetan sasán rahun ne’e susar tanba ne’e presiza Governu apoiu foos ho saka tomak.
Iha fatin hanesan Diretór Eskola Sekundária Jerál 04 Setembru UNAMET, Balide, Dili, Sergio Alfredo da Cruz, hateten karik iha desizaun hosi Governu atu reativa fali eskola ne’e susar uitoan tanba daudaun komunidade ne’ebé afeta ba inundasaun uza hela espasu eskola nian.
“Karik Governu deside atu reativa fali eskola, Governu tenke haree oinsá rezolve tiha vítima ne’ebé daudaun hela iha Eskola 04 Setembru UNAMET, nune’e aula bele mamuk bainhira prosesu aprendizajen atu la’o,” Sergio Alfredo da Cruz hateten.
Jornalista : Arminda Fonseca
Editór : Francisco Simões
