DILI, 26 abríl 2021 (TATOLI) – Communinity pantry in Timor-Leste kompostu hosi sidadaun Filipina no Timor-oan sira ne’ebé hamahan-an iha movimentu “Mission Timor Vikeke Community Center (MTVCC) halo asaun karidade hodi apoiu ai-han no ai-fuan ba komunidade ne’ebé presiza.
Ofisiál Lokál iha Embaixada Filipina, Rozilia Esperança dos Reis, hateten ba Agência Tatoli iha Sentru Konvensaun Dili, segunda ne’e, katak asaun ida ne’e sira halo atu tulun malu hodi apoiu maluk sira seluk ne’ebé presiza ai-han ba loron ida nian.
“Ami kria inisiativa ida-ne’e ho konseitu ida katak ita hotu mesak Timoroan de’it presiza lolon-liman ba malu hodi tulun malu,” Rozilia Esperansa dos Reis haktuir.
Rozilia dehan asaun ida-ne’e sira hala’o ba dala haat ona no ai-han ne’ebé sira oferese tau hamutuk iha fatin ida depois mak komunidade ka kolega ne’ebé presiza bele mai foti.
Iha fatin hanesan prezidente Mission Timor Vikeke Community Center (MTVCC) José Maria Amaral, afirma katak asaun karidade ne’e la’ós atu buka naran ka buka popularidade. Nu’udar Timor-oan iha interese ba malu liuliu ba maluk sira ne’ebé enfrenta difikuldade iha situasaun pandemia COVID-19 no kauza hosi kalamidade ne’ebé akontese foin lalais ne’e.
Nia esplika asaun karidade ne’e sira realiza tanba hetan mós hanoin di’ak hosi maluk komunidade Filipina oan sira iha Timor, asaun hanesan ne’e halo ona iha Filipina no Community pantry Timor-Leste koko aplika mós iha Timor.
“Ami realiza asaun fahe ai-han ba komunidade tanba iha referénsia di’ak hosi komunidade Filipina oan-sira, ami haree ideia ida ne’e di’ak. Nune’e, ami koko aplika iha ita-nia komunidade,” José Maria Amaral hateten.
Jornalista : Tomé Amado
Editór : Francisco Simões
