DILI, 05 maiu 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, konsidera graduasaun virtuál ba estudante 100-resin atu realiza iha fulan ida-ne’e, parte Universidade Nasionál Timor Lorosa’e (UNTL) tenke aprezenta uluk mekanizmu no ferramenta ida di’ak ba Governu.
Notísia relevante : Fulan ne’e, UNTL halo graduasaun virtuál ba estudante finalista 100-resin
“Ha’u informa ona katak graduasaun virtuál ne’e foin mak atu realiza ba dahuluk no foin mak atu akontese iha UNTL. Tan ne’e, ha’u husu ba UNTL atu prepara mekanizmu ho didi’ak, liuliu ferramenta ne’ebé atu uza ba graduadu virtuál ne’e,” Ministru Longuinhos dos Santos hateten ba jornalista sira hafoin remata enkontru konsellu ministru iha edifísiu Ministériu Finansas, dili, kuarta ne’e.
Ministru Longuinhos, hateten asuntu graduasaun virtuál ne’e la lori polémika ida ba Ministériu, naran katak preparasaun UNTL nian mak tenke adekuadu atu bele garante graduasaun ne’e la’o ho di’ak.
Nia afirma katak graduasaun virtuál ne’e atu akontese iha fulan ida ne’e naran katak labele kontra filafali regra ka protokolu ne’ebé rekomenda hosi Ministériu Saúde no Organizasaun Mundiál Saúde nian.
Jornalista : Tomé Amado
Editór : Francisco Simões
