Dosente 20 preparadu atu halo peskiza sientífika iha área lima
DILI, 13 maiu 2021 (TATOLI) – Institutu Nasionál Siénsia Teknolojia (INCT), tinan ne’e, kontinua aloka orsamentu purvolta rihun $100-resin atu apoiu dosente na’in-20 atu halo tan peskiza sientífiku iha area agrikultura, ekonomia, edukasaun, sósiu kulturál no igualdade jéneru.
Notísia Relevante : INCT deskobre área edukasaun-turizmu abandonadu
Prezidente INCT, José Cornelio Guterres, kinta ne’e, informa ba jornalista-sira katak, tinan ne’e INCT kontinua loke tan oportunidade ba dosente peskizadór-sira atu halo peskiza tanba tinan kotuk (2019-red) dosente peskizadór hosi universidade lima mak halo ona peskiza iha área hitu no rezultadu públika ona iha jornál internasionál.
José Cornelio iha ninia servisu fatin, Dili, hateten iha kotuk 2019 dosente peskizadór hosi universidade lima mak halo ona peskiza sientífiku iha área hitu hanesan turizmu, ekonomia, saúde, edukasaun, agrikultura, sósiu kulturál no igualdade jéneru. Rezultadu hosi peskiza ne’e Institute of Business (IOB) ninia peskiza iha Atauru kona-ba area turizmu mak di’ak liu.
Dosente peskizadór-sira hosi universidade lima ne’e mak hanesan Universidade da Paz (UNPAZ), Universidade Nasionál Timor Lorosa’e (UNTL), Universidade Dili (UNDIL), IOB ho Institutu Superiór Kristál (ISC).
INCT hakarak kontinua tan halo peskiza sientífiku iha tinan ne’e atu hetan tan rezultadu di’ak hodi valoriza nafatin matenek peskizadór Timoroan sira-nian iha peskiza sientífiku sira.
Notísia Relevante : INCT ezekuta OJE 2021 foin atinje 25%
Jornalista : Tomé Amado
Editór : Francisco Simões
