MESSK submete tan lista estudante IBTL ba MF
DILI, 10 juñu 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, kinta ne’e, submete tan lista foun estudante Instituisaun Boaventura Timor-Leste (IBTL) ba Ministériu Finansas atu prosesa hamutuk ho instituisaun ensinu superior sira seluk hodi hetan injesaun propina ho subsídiu pulsa internet.
Notísia Relevante : MESSK propoin millaun $19-resin ba ijensaun propinas no fornesimentu internete
“Lista injesaun propina inklui pulsa internet ba estudante sira nian, ami finaliza ona, horisehik, mézmu IBTL mak tarde uitoan,” Ministru Longuinhos dos Santos informa ba jornalista-sira iha Centro Convenção Dili (CCD), kinta ne’e.
Nia esplika IBTL mak adianta prosesu hotu, maibé agora MESSK aprezenta hotu ona ba Ministériu Finansas no agora bele halo ona prosesu pagamentu ho fundus COVID-19 nian.
Iha sorin seluk, Magnífiku Reitóra IBTL, Quiteria da Costa, hateten IBTL submete hotu ona lista estudante 200-resin ba MESSK. Atraza uitoan tanba estudante-sira hasoru difikuldade iha prosesu deklarasaun banku nian.
Quiteria da Costa, konfesa katak difikuldade ba sira maka bainhira estudante-sira atu hetan subsídiu ba pulsa, tanba estudante barak mak seidauk hatama númeru kontaktu to’o ohin loron. barak sei iha munisípiu no estudante balun laiha telefone.
Jornalista : Tomé Amado
Editór : Francisco Simões
