DILI, 16 juñu 2021 (TATOLI) – Prezidente Federasaun Atletizmu Timor-Leste (FATL), Afranio Xavier Amaral, informa katak sábadu semana ne’e, FATL sei loke torneiu kurida ida ho kilómetru 3 to’o 5 involve atleta atletizmu, alunu eskola sekundáriu-sira iha Gleno hanesan meiu ida hodi halo promosaun ba atleta Atletizmu Felisberto de Deus molok ba partisipa iha Olimpics Games iha Tokyo, Japaun fulan oin.
Notísia Relevante : Atleta timoroan na’in-haat sei partisipa Olympics Games
Nia dehan, iha kurida promosaun ne’e atleta Felisberto de Deus sei halai akompaña hosi klaran no ba eventu promosaun ne’e Federasaun Atletizmu halo ona koordenasaun ona ho Sekretaria Estadu Juventude no Desportu, Polísia Nasionál Timor-Leste (PNTL) eskuadra Gleno, Prezidente Autoridade Munisipiu Ermera, Ministériu Saúde Munisípiu Ermera ho parte relevante hotu atu fó apresiasaun ba Felisberto de Deus ne’ebé atu ba partisipa iha Olimpics Games ne’e.
Ba Agência Tatoli iha Jináziu Dili, kuarta ne’e, Afranio klarifika katak, promosaun ne’e la’ós ba Atletizmu de’it, maibé Natasaun nian sei halo iha Picina de Baucau, semana oin, inklui atleta Taekwondo maibé sei iha prosesu nia laran tanba hetan hela difikuldade uitoan.
Jornalista : Hortencio Sanchez
Editór : Francisco Simões
