DILI, 21 juñu 2021 (TATOLI) – Federasaun Futeból Timor-Leste (FFTL) prepara ona kalendáriu tentativu ba liga Feto Timor-Leste ne’ebé sei realiza iha agostu, tinan ne’e.
Notísia Relevante : Buibere kampiaun tasa Rosa “Muki” Bonaparte
“Ita hare agora ema iha Timor liu-liu Dili laran simu vasina no kazu COVID-19 komesa menus ona, entaun FFTL foti desizaun hodi halo preparasaun ba Liga Feto nian, ami halo ona kalendáriu tentativu no ezekutivu sira sei diskute sábadu agora,” adjuntu Sekretáriu Jerál FFTL, Frederico Martins, informa ba Agência Tatoli, segunda ne’e, iha Edifísiu FFTL, Dili.
Desizaun ne’ebé FFTL foti bazeia mós ba jogadór feto sira hosi klube ida-idak 50% vasina hotu ona.
“Jogadór feto sira maioria vasina hotu ona, tuir dadus ne’ebé ami hetan 50% entaun kada loron vasina aumenta ita bele hala’o jogu ona. Kalendáriu ne’ebé ita hala’o jogu ba Primeira Divizaun sei hahú iha loron 21 agostu to’o loron 9 outubru no Segundu Divizaun hala’o iha loron 19 agostu to’o loron 8 setembru 2021,” Frederico Martins hateten.
Klube Primeira Divizaun hamutuk lima (5) mak hanesan, Buibere FC, AD. SLB Laulara, Maranatha FC, S’Amuser FC no Academica FC.
Klube Segunda Divizaun iha neen (6) mak hanesan, M-VDL FC, UNITAL FC, Nain Feto FC, São José FC, ASS. Baucau FC no Maudoko FC.
Jornalista : Hortencio Sanchez
Editór : Francisco Simões
