Funsionáriu na’in-90 iha UNITAL simu ona vasina
DILI, 28 juñu 2021 (TATOLI) –Funsionáriu administrasaun no korpu dosente hosi Universidade Orientál (UNITÁL) hamutuk na’in-90 simu ona vasina.
Magnífiku Reitór UNITÁL, Florindo Pereira hateten, dadus detallu kona-bá dosente no funsionáriu na’in hira mak simu ona vasina nia seidauk iha. Maibé na’in 90 mak rejistadu vasina ona iha universidade.
“Ha’u husu nafatin ba dosente no funsionáriu administrasaun hotu atu koopera ho Governu hodi bele hetan vasinasaun tanba rekizitu ida atu re-ativa atividade letiva iha ensinu superiór, tenke simu vasina,” Florindo Pereira haktuir ba Agência Tatoli iha salaun Ian Martin, INFORDEPE, Balide, Dili, segunda ne’e.
Florindo afirma dosente no funsionáriu ne’ebé seidauk vasina to’o tempu Governu deside re-ativa eskola, sira laiha direitu atu partisipa iha prosesu ensinu aprendizajen aula prejensiál.
Jornalista : Tomé Amado
Editór : Francisco Simões
