LAUTÉM, 01 jullu 2021 (TATOLI)–Negosiante merkadu Iliomar, postu administrativu Iliomar, munisípiu Lautém, Marito da Silva, hateten, atividade merkadu no folin sasán la’o normál maski rendimentu menus.
“Folin nafatin la hatún, la hasa’e, no merkadu la’o normál,” Negosiante hateten ba Agência TATOLI, iha merkadu Iliomar, kinta ne’e.

Tuir Marito, laiha diferente folin sasán antes no hafoin implementasaun Serka Sanitária kauza pandemia COVID-19, maibé rendimentu mak loron ida bele to’o de’it $5.
“La barak maibé sempre mai, loron ida dalaruma $1 ka $2, kuandu sosa barak bele to’o $5 mak hanesan ne’e de’it ona,” nia akresenta.
Nune’e, hosi observasaun Agência TATOLI iha merkadu Iliomar, negosiante sira fa’an produtu lokál hanesan ai-farina, batar, fehuk, talas, lakeru, aimanas, hudi no seluk ho folin normál, butuk ida $0,50 to’o $1.
Postu administrativu Iliomar rasik hamutuk suku neen neen hanesan Fuat, Aelebere, Kainliu, Iliomar I no II inklui Tirilolo, ho totál populasaun hamutuk 7.201.
Jornalista : Natalino Belo
Editora : Julia Chatarina